چوخ ائتمه قاش-گؤز ایله، سئوگیلیم، اشاره منه!
اورکده هر نه سؤزون وار، دئ آشکاره منه!
خوشام قیلینج قاشینی گؤسترینجه اغیاره،
جفا ایله ووراسان یاره اوسته یاره منه.
اۆزونده خالینی گؤردوکجه شاد اولور کؤنلوم،
نه آی وئرر بو صفانی، نه ده ستاره منه.
کتابِ عشقینی بیر-بیر ورقلهدیم، باخدیم،
وصاله یئتمهیه خوش گلدی استخاره منه.
طبیعت عشق بلاسین منه وظیفه وئریب،
اودور کی جؤور ائدیر هر نازلی ماهپاره منه.
گؤزل کی عاشقین اینجیتمهدی، بوراخ گئتسین!
سئویننَم ائتسه جفا سئوگیلیم دوباره منه.
دیار عشقده اؤز درد و محنتین اونودار،
بو حالده ائدن اولسا اگر نظاره منه.
ایشی گیریشمه، گهی نازدیر، گهی غمزه،
نه قالدی ائتمهمیش اولسون او زولفو قاره منه؟
دئدیم طبیبه: منی، قویما، ییخدی نشئهی مئی،
لبِ نگاریمی یازدی بیرینجی چاره منه.
شرابی وقف ائلهرم «واحد»، اؤز ثوابی اوچون،
شرابخانهلری وئرسهلر اجاره منه.
#علیآقا_واحد
@Zanjan4531sievan
