بوست طويل شوي بس موجه للإناث بالدرجة الأولى، وبتمنى تفكروا بالحكي
إذا عجبكن خدوا منو، وإذا ما عجبكن تجاهلوه
ما بحب أعطي حالي دور الناصحة، بس بحس من مسؤوليتي أوقات ضوي عكم نقطة من خلال تجربتي وكوني قررت كون شخصية عامة
عزيزتي الفتاة، نحنا مجتمع عربي مشوه مدعي للحرية والتحرر وللأسف بسوريا نتجه نحو سقوط أخلاقي كبير كتير، ومهما حكينا عن الحرية والتحرر، لسه في خطوط حمراء موجودة بمجتمعنا، وتجاوزها أوقات ممكن يضرّك إنتِ قبل أي حدا تاني، نفسياً وجسدياً واجتماعياً
أنا بنت مستقلة وسيدة حالي، وبنفس الوقت جزء كبير مني شرقي، وأنا متمسكة بهالجزء وبعتبره جزء من هويتي، مو لأنه بيقيدني، بالعكس، لأنه بيعطيني توازن وبخليني أعرف شو بناسبني وشو لأ وبكتير محلات بيحميني
ولا يوم نطرت شب يجيبلي هدية، أو يعطيني مصاري، أو يسفرني
كل شي حلمت فيه حاولت أوصلله بعقلي وشغلي واجتهادي وعملي اللي مكرسة كل حياتي تقريباً إلو
وبالنسبة إلي استقلال البنت وقدرتها تعتمد على حالها أهم من أي شي ممكن يقدملها ياه شخص تاني
أنا مع إن كل بنت تعيش بحرية، تلبس وتشتغل وتسافر وتختار رفقاتها وعلاقاتها بالطريقة اللي بتشبهها
بس بنفس الوقت، لازم نكون واعيين للمجتمع اللي عايشين فيه لأنه للأسف، نفس المجتمع اللي ممكن يحكيلك عن الحرية، ممكن يكون أول واحد يحكم عليكي ويشوه صورتك عند أول فرصة
ليش عم احكي هالحديث ؟
لان بلشت حس بهالشي أكتر بالفترة الأخيرة، إنو صفحتي ممكن تكون بمحل إلهام لكتير بنات متأثرين بتجربتي وعم شجعن وأعطيهن أمل أنو فيهن يكونو متلي.
ولهيك مثل ما بشارككن سفري وتجارب حياتي وشغلي، بحس مهم شارككن كمان الشي اللي تعلمته خلال 16 سنة من الاستقلال والسفر والتجارب: عيشي حريتك، بس لا تخسري حالك كرمالها
اختاري محيطك بعناية، انتبهي لمين بتوثقي، وحافظي على حدودك وعلى راحتك النفسية.
أنا اليوم سنغل، وسعيدة جداً بهالقرار
مو لأن الوحدة هي الصح للجميع، بس لأنه بالنسبة إلي راحة البال والاستقلال أهم من أي علاقة ما بتشبهني
حريتك حقك، بس حماية حالك كمان مسؤوليتك وفرض وصلاة وقداسة ماحدا مسؤل عنها غيرك ❤️
من ١٢ سنة كان حلمي زور فرنسا ،زرتها بعد مثابرة وشغل وتعب وعناء ،زرتها بجهدي وتعبي وبدون ما أخسر ولا مبدأ حطيتو بحياتي لحماية نفسي من هالمجتمع
انتبهي لنفسك عزيزتي المرأة أنتي سبب استمرار البشرية ، منك وإليك يبدأ وينتهي العالم ،احمي حالك.
كتابة مرح اللابد..
وهي رابط صفحة الفيس بوك:
https://www.facebook.com/share/19FWPxNTRY/
28
1September 9, 2026 225 2
