Пуль
Стака азондомс сянь, мезе ашель.
Стака лятфнемс и сянь, мезе ульсь.
Седись най кати-ков бта кяшель,
Да аф максы, няк, мадонды пульсь.
Тя пульть эсот и шитне, и ветне,
Конат ётасть и мялямти тусть.
Тясот ушетксне, тясот и петне,
Лемсна сятнень, кит павазснон мусть.
Ётафть инкса аф путови питне.
Но сон пандома, простямат аш.
Стама пульса аф атцевихть китне,
Стама пулькс арсихть лятфнемат таштт.
И синь кодавихть, сотневихть, пяльдихть…
Эряфть комачай паргана пульсь.
Сембось ётни. И лядондыхть сяльде
Мода мархт. Алост ся, мезе ульсь.
✍️ Марина Агеева (Стешина)
