ليش بأميركا الـ Paracetamol اسمه Acetaminophen وببريطانيا والاتحاد الاوربي اسمه Paracetamol ⁉️
👈تسمية الاسماء العلمية للادوية تصير حسب نظامين للتسمية اللي هي INN و NNN
مثل منعرف من يكتشفون دواء جديد، لازم ينطوه اسم علمي حتى يصير معروف بين الصيادلة والاطباء وكل شخص يعمل بالمجال الطبي بكل العالم. وهنا يجي دور أنظمة التسمية.
✅أهم نظام هو
INN (International Nonproprietary Name)
وهذا النظام تعتمده منظمة الصحة العالمية (WHO)، وهدفه يكون لكل دواء اسم علمي واحد يُستخدم بأغلب دول العالم🌎.
فمثلًا الاسم العلمي الدولي للمضاد الحيوي المعروف Amoxicillin هو بكل العالم موحد اما الاسم التجاري فهذا بحث اخر … اكيد يختلف حسب الشركة اللي صنعت الدواء كل شركة تسمي اسم خاص بيها 🤝.
لكن مو كل الدول كانت تمشي بنفس التسمية من البداية. قبل اعتماد نظام الـ INN، كانت بعض الدول تسمي الأدوية حسب أنظمتها الوطنية، أنظمة تسمية تُعرف بـ NNN (National Nonproprietary Names)، أي الأسماء العلمية الوطنية.
فمثلًا:
بالولايات المتحدة 🇺🇸أكو نظام اسمه
USAN (United States Adopted Names).
وببريطانيا 🇬🇧أكو
BAN (British Approved Name).
باليابان 🇯🇵أكو
JAN (Japanese Accepted Name).
وبفرنسا 🇫🇷 أكو
DCF (Dénomination Commune Française).
غالبا تكون الأسماء نفسها وموحدة بكل الدول ولكن لكل قاعدة شذوذ …أشهر مثال هو دواء Paracetamol، فهذا هو الاسم الدولي (INN)، بينما بالولايات المتحدة يسموه Acetaminophen حسب نظام USAN.
لذلك بالصيدلية اذا تشوف الايتمات اللي منشأها امريكي وبيها paracetamol نشوفهم كاتبين Acetaminophen
ومثال ثاني هو Phytomenadione، وهو الاسم الدولي 🌎 لفيتامين K₁، بينما بالولايات المتحدة يسموه Phytonadione.
واليوم أغلب الدول تتجه لاعتماد أسماء INN حتى تقل الأخطاء الدوائية، وتصير الأسماء موحدة بين كل دول العالم، وحتى تسهل قراءة المصادر والأبحاث والوصفات والتواصل بين مقدمي الرعاية الصحية.
🔹 ملاحظة: منظمات التسمية مثل INN وUSAN وBAN وظيفتها اعتماد الأسماء العلمية فقط، وما إلها أي علاقة بالأسماء التجارية مثل Panadol أو Adol أو Doliprane، لأن هاي الأسماء تختارها الشركات المصنعة .
2
1August 3, 2026 375 2
