كل ما قعدت مع نفسك حتحس انك مضيع وقتك
وقاعد ساي وماف شيء بتعملو برجع ليك بفايدة!
جرب اشتغل!
ايي جرب وانتِ جربي ..
شوفو لمن تشتغلو وتجيكم قروش بتعبكم بتحسو بشنو!
انا ايام تالت كان كللل حلمي اني انتهي بسس من تالت …
نسيت بقرأ لشنو ذاتو المهم انتهي من الابتلاء الجاني ده.
وحالياً بقيت بفكر في شيء تاني بقى عندي حاجة اسمها طموح عايزة احققو حتى لو هو عادي للبعض!
…
حاليا لي شهر من نزلت شغل!
وحاسة بتغيير في شخصيتي رهيييب!!!!
لدرجة الحولي ملاحظ!
• بقيت باخد وبدي أكتر في الكلام
• بعرف اتناقش معاك نقاش مُثمر نصل لي نتيج "بإستثناء أصحاب الرأي الواحد"
* ثقتي في نفسي ذادت، ذادت شديد
* تعاملي مع أصحاب المحلات وكلو لمن اجي اشتري اتغير عارفين لي؟ لأنو عرفت كيف هم بيتعبو لمن تخش وتسأل من مليون حاجة وفي الأخر ما تشتري
* اتعلمت ان الكلمة الطيبة مفتاح نجاح!
عارفين كيف؟
الزبون انت لازم تكسبو فأكيد ما حتكسبو بالرد البارد، او الرد المسيخ، او ترد ليو بِـ حِده …
اسلوبك الحلو بخلو ابناس يحبوك انت نفسك في ذاتك خلي المحل..
بتحس بالمسؤلية ودي أهم نقطة مفروض تركزو فيها ، بتشوف تعب امك وأبوك ده كيف والقروش دي بتعرف تاني تنظم طريقة خروجها وترتيب اولوياتك علشان القروش تكفي وووو.. الخ
طول ما انت قاعد في البيت وبتسكرول بس من تك توك لـ انستا لـ فيس ماف فايدة كدا مُخك بيخمل وبيتبرمج على كسل …
فتشو!
ماتقولو مافي فتش وأدعو ربنا يدلكم على شغل كويس انزلو الشارع ده امشو ااسوق محل محل اسألو لو عايزين زول للشغل.
وعمرو الشغل ما كان عيب اياً كان ان شاء الله لو بتبيع اسكريم في الشارع ده يا سيدي بحلال الله ده اي شيء سمح.
وأخيراً
{ وَيَرْزُقْهُ مِنْ حَيْثُ لَا يَحْتَسِبُ وَمَنْ يَتَوَكَّلْ عَلَى اللَّهِ فَهُوَ حَسْبُهُ إِنَّ اللَّهَ بَالِغُ أَمْرِهِ قَدْ جَعَلَ اللَّهُ لِكُلِّ شَيْءٍ قَدْرًا }
[سُورَةُ الطَّلَاقِ: ٣]
#لمى_هلالي
#إنزل_إشتغل
