تظل الدراسة بالمانيا من اكثر الوجهات الدراسية شعبية بالخارج، وعلى الرغم من المعروف عن سهولة ورخص الدراسة بيها، الا انه التقديم هناك مو بذيج السهولة لطالب دولي، وتكدر تقرا هذا الدليل المتكامل علمود تعرف اكثر:
- بالبداية، تحتاج تعرف اذا كانت شهادتك معترف بيها بالمانيا، وعادة اذا جنت من الاتحاد الاوربي من دول مثل ليختنشتاين، ايسلندا، النرويج أو سويسرا فشهادتك المفروض تكون مؤهلة للدخول لجامعة المانية، وهذا الشيء ينطبق هم على الطلاب الدوليين الي ماخذين Abitur (الStandardized Test بالمانيا) من اي مدرسة المانية خارجية او بشكل خاص، بس انت الله غاضب عليك وولدان بالعراق وكاعد 12 سنة بدون ما تسوي اي شيء، فشنو الحل؟ لازم تاخذ دورة اساسية اسمها Studienkolleg لمدة سنة وحدة علمود تتحضر لاخذ امتحان القبول الجامعي Feststellungsprüfung للتاهل.
- ولازم هم اقل شيء تكون بمستوى B1 ضمن الCEFR باللغة الالمانية علمود تكدر تدخل، لانه اغلب البرامج الدراسية هناك تكون بالالماني، وعلمود تثبت كفاءتك اللغوية تكدر تاخذ واحد من ذولة الاختبارين:
DSH (Deutsche Sprachprüfung für den Hochschulzugang)
TestDaF (Test Deutsch als Fremd sprache)
علما انه مجموعة من المؤسسات الالمانية تقدم هم برامج دراسية بالانكليزي، واكيد رح تحتاجلهم درجة TOEFL/IELTS.
*باختصار، المتطلبات العامة للتقديم على البكالوريوس بالمانيا هي:
- شهادة عبور الثانوية (البكالوريا) ودرجاتك من الاعدادية (اخر 3 صفوف بالثانوية)
- درجة امتحان تاهيل القبول الجامعي
- شهادة اللغة الألمانية (او الانكليزية اذا جان البرنامج بالانكليزي)
- رسالة تحفيزية ومراجع توصية بضمنها نشاطات مجتمعية وغيرها (اختيارية)
اذا جنت متابع قنوات المنح على التليكرام، أو اي مكان ثاني يوفر منح. راح تشوف المنح اللي توفرها الجامعات الالمانية للدراسة منتشرة بشكل جبير، بس بنفس الوكت المنح هاي عدها متطلباتها، وحتى تدرس بجامعات المانيا ببلاش كليا، يتطلب معرفتك باللغة الألمانية، واليوم راح نحجي عن أهمية تعلم اللغة الألمانية. لغة الفلاسفة، والمفكرين اللي يريدون يطلعون برة العراق.
الألمانية هي من أهم اللغات بعد الانكليزية والمندرينية (اللغة الصينية). كون تعتبر ألمانيا ثاني أكبر وجهة عالمية للهجرة، بحيث يشكل المهاجرين نسبة 20% من عدد السكان، وهالشي يرجع لتوفر فرص العمل أكثر نسبيا من باقي الدول، وبسبب الأجور المرتفعة. تعلمك اللغة الالمانية مو بس راح يفيدك بالعيش او الدراسة هناك وانما بشغلك وحياتك المهنية بشكل عام، وبهواية دول يزيد راتب الشخص لمجرد انه يعرف يحجي الماني.
تعتبر الالمانية مثل باقي اللغات، عملية دراسة وتعلم اللغة تمر بعدة مراحل وفعاليات حتى ترسخ الكلمات والقواعد بذاكرتك. تبدي رحلتك بالتعلم بوضع هدف او مستوى تريد توصله بالبداية، وبعدين تبحث عن مصدر مناسب تتعلم بي، ممكن يكون كورسات من منصات عالمية مثل (Coursera/Udemy/Futurelearn) أو كتب أو معاهد تدريسية. بعدين تبدي تحفظ الكلمات المشهورة والشائعة باللغة، وتلاحظ طريقة كتابتها ولفظها وتحاول تتعلم منها، وحتى لا يسبقك الملل برحتلك للتعلم، حاول تتطلع أكثر على تاريخ وحضارة الدولة وثقافتها وأسمع اغانيها (حيساعدك بتطوير استماعك)، وأهم شي تلكى طريقة تمارس بيها لغتك.
عدد الكلمات الألمانية اللي تحتاج تعرفها حتى تتقنها هي 10,000 كلمة وشهادة إتقانها يسموها (DSH, Telc C1 hochschule)، ونسبة المتحدثين عالميا 2%، بس هذا ميخلي تعلم الالمانية شي مستحيل، لان اكو الاف المصادر للتعلم اضافة كون الجامعات تطلب مستوى أقل من C1 بعض المرات.
معلومات مهمة حتلاحظها باللغة:
-بالألمانية اكو ثلاثة أجناس، مو بس جنسين (المذكر، والمؤنث)، ويكون بمعنى شيء أو اسم حيادي حيث يتحديد جنس الكلمة من القواعد بشكل مطلق.
-الأحرف اللاتينية الكبيرة هي المستخدمة دائما.
-تشتهر بكلماتها الطويلة المركبة اللي غالبا تكون معقدة النطق ووجود كلمات ما تلاحظون الها شبه بالمعنى بغير لغة كتعبير، حيث اللغة الالمانية تمتاز بكونها لغة وصف.
-شي مميز بيها هو الحرف (ß) ويكون صوتي ووحدها الألمانية تمتلكها.
-يستخدمون الحرف E بكثرة بحيث النطق يكون ثكيل ويحتاج تمرن لسانك هواية عليه.
-حتلاحظ تعقيد بالجمع باستخدام (der, die, das) لان ماكو قاعدة جمع معينة والكلمات كلها مكونة من تراكيب عدة لذلك معقدة بسبب عدم وجود فراغات ف الناس تحسها صعبة.
عدة مصادر راح تفيدك بالتعلم:
- Dutch info
- Learn German DW
- دروس تعليم اللغة الالمانية/Youtube Playlist
- BBC German
- Easy German
- Diaa Abdullah/Youtube Channel
- Khaled Bozan German Language Teacher
عندك أسئلة تريد تسألها عن المقالة؟ تريد تتعرف على ناس ديتعلمون الماني؟ لتنسى تحضر فقرة الاسئلة والاجوبة بخصوص المقال، واللي راح تصير بمجتمعنا (البوست اوفس) على الرابط: https://t.me/thepostoff 🤍!
