"وائل،
قلّك شي؟
إلي زمان مش كاتبة، ومش كاتبتلَك بالخصوص.
جوّاتي بارد، كإنّو كل البرد ل تجمّع بعضام النّاس ل ما لقت بيوت
وقعدت ع الرّصيف بالشهور الماضية، تجمّع فيه.
بجي بدّي اكتب، بينتقل هالبرد ع كلماتي وبجمّدها،
بحرق كل الورق ل عندي ل دفّيها، وفش أمل.
بجي بدّي صوّر، نفس البرد بكمّل طريقو ع ايدي وبوقّفها.
قالولي طب البسي عليكِ، اتدفّي،
اقعدي شوي بشمس تمّوز، بتحرقك حرق، اسمعي منّا.
وأنا يا وائل تعلّمت، خاصّة من بعدك،
معش إسمع لإنسان، لإنّو طلع الحكي ل بينقال من التمّ
ربعو جمل مصفوفة إلهاش معنى ونصّو كذب وتجليط
والرّبع الباقي حسب كل واحد وفهماتو..
بس مع هيك ردّيت، قلت منطق الحكي،
وقفت بعزّ الشّوب ولابسة فرو بيخنق،
وما صار شي، ما انفكت الجمدة..
بتعرف، حتّى هيدا النص بارد،
وحكيي معك اليوم أبرَد، شو عم قول يعني؟
لا عم قلّك شي حلو متل عادتي ل كانت تخلّيك تنفش ريشك،
ولا عم عاتبك ع غيابك ل ولا مرّة حسّيت بالذّنب عليه
ولا عم اشرح وجعي ولا حتّى عم انقل قصّة بمعنى..
كلّو ما إلو معنى ولا بهجة..
اشتقت حتّى بإنّو حسّ بإنّي بدّي بهدلك،
تخايل؟
أي شي شو ما كان، المهم حس..
أيمتى وبأي وقت هالقد فقدنا حالنا ول فيها؟
عم قول يمكن؟
يمكن دموع الأمهات كلها إجت وسكنت بعيوني،
وبكي الولاد سحب ع زاوية بروحي وقعد فيها،
وكسرة قلب الأحباب الفاقدين مسكت إيدي إلي،
وغربة الأصحاب ل سبقوهن رفقاتهن وخسروا سندهن،
خلّت روحي يتيمة معهن..
ويمكن،
ويمكن غيابَك خلّا هالشي كلّو أصعب..
من قبل الحر.ب ل بعدها ل الهدنة ل مش هدنة أصلًا،
ل اليوم ول هلّأ وأنا عم اكتُب النّص،
كان عندي سؤال واحد مرافقني:
"هيدول كلّن،
مش كانوا صاروا أخفّ لو إنت حدّي؟
مش كانت هالسّقعة، دفيِت؟
ولو شوي؟"
زَهراء.
حكي بالعاميّة، بعد غياب.. ✨️
