الرئيس الأمريكي السابق (باراك أوباما) نزل تغريدة مع صورة قديمة اله من… — تَسْبيح تكروري؛ — TG.ME

الرئيس الأمريكي السابق (باراك أوباما) نزل تغريدة مع صورة قديمة اله من حفلات العشاء اللي كان يقيمها أحتفالاً بعيد الفصح اليهودي... بيحكي فيها انه هاد العيد بذكره بالمرونة، والفداء، والتحمل والبعث في مواجهة الاضطهاد والخرابيط...وقال انه هاد الاشي حقيقي اليوم أكثر من اي يوم آخر.. وقال خلونا نتذكر كل من لا يستطيع أن يحتفل بهذا العيد مع أحبائه. خصوصا بهالوقت اللي فيه كثيرة معاناة وخسائر في "ازراييل" و"غزة"! حقيقة أنا بكل التغريدة هاي مش مهتمة غير بشغلة واحدة صارت نمط ملحوظ بشكل كبير في الخطاب الغربي الرسمي وهي تجنب ذكر فلسطين نهائيا.. بتلاقيهم بحكوا عن غزة وكأنها جزيرة ما في مكان ما غير فلسطيني!!! مثال آخر، منذ فترة قريبة جامعة دندي كانت متعاطفة مع طالب فلسطيني تعرض لاعتداء كراهية بالمدينة، وبالتالي بعث رئيس الجامعة المتعاطف مع قضيتنا رسالة لجميع الطلاب عبر فيها عن رفضه لكل مظاهر الكراهية ودعمه للطالب، اللافت جدا في الايميل بالنسبة الي كان عنوانه: .Gaza, hate crimes, and protecting our community في تجنب واضح لذكر كلمة فلسطين، مع انه ممكن ذكر (غزة، فلسطين)... بس لا! حتى تغطية الحرب الحالية في الاعلام الغربي بسموها (حرب غزة- ازراييل) او(حرب خاماس-ازراييل)! قبل الحرب كان لافت جدا جدا عند الحديث عن القضية دائما في ذكر لدولة الكيان وبالمقابل ذكر"الفلسطينيين" دون الاشارة لفلسطين، وحتى أغلب الأوراق البحثية اللي بتدرس اي شي متعلق بالقضية بتحكي "ازراييل مقابل الفلسطينيين" وليس فلسطين. يبدو في خوف من ذكر كلمة فلسطين.. أو الاعتراف بهالدولة حتى لو بس كلاميا. وعليه بدعوا كل الشباب والصبايا وخصوصا اللي في الغرب انهم ينتبهوا عند أي نشاط بذكر فلسطين بشكل مباشر، وعدم الاكتفاء بذكر غزة او الضفة او القدس لوحدهم.