سادسا : اتعلم انك تقول لا حاجات كتيرة أوى فى حياتنا احنا بنعملها غصب… — تقدير الذات ( دعاء راجح ) — TG.ME

سادسا : اتعلم انك تقول لا حاجات كتيرة أوى فى حياتنا احنا بنعملها غصب عننا بنعملها علشان نرضى الآخرين بنعملها علشان لازم نعملها و مانعرفش ليه بنعملها علشان خايفين : خايفين من منظرنا ادام الناس خايفين من ان الناس تزعل مننا و تنتقدنا او تلومنا خايفين احسن نحس بالذنب بنعملها بشكل قهرى و غصب بنعملها علشان المفروض نعملها من أجمل التمارين الى عملتها مع نفسى فى مرحلة ما انى كتبت كل الحاجات الى مبحبش أعملها فى حياتى و الى بحس انى مجبرة اعملها و باعملها غصب و بعدين بدأت أفكر فى كل حاجة فيهم انا باعملها ليه ؟ شفت فوايد الحاجات دى علىّ أو فوايدها للآخرين ؟ هل هى واجبات و الا "فضل" تم فرضه علىّ؟ لو توقفت عن انى أعمله هيحصل ايه ؟ هل النتايج مستعدة اتحملها ؟ قررت انى مش هاعمل حاجة غصب عنى و علشان أرضى الناس و بس و طلعت بتلات مجموعات: مجموعة انا قررت أعملها علشان هى واجبات أو ليها فوايد لى او للآخرين فوايد دنيوية او أخروية فقرارى انى اعملها حسسنى بحرية القرار و انها مش واجب علىّ و لا مفروضة علىّ من برة فيه حاجات قررت ما اعملهاش خالص علشان مالهاش اى فايدة لى و تقيلة على قلبى و دى الى قررت أقول فيها : لأ و فيه حاجات قررت اعملها بحساب يعنى لما يجينى رغبة أعملها أعملها ودى العطاءات و التضحيات الموضوع دا خلانى أشوف الحاجات المفروضة على هل هى واجبات و مهمة فعلا و ماينفعش اسيبها ؟ هل هى مجرد فضل مش واجب على و الناس الى فرضته على ؟ هل هقدر أقول "لأ" و اعمل الحاجة برغبة و ارادة داخلية مش علشان إرضاء الآخرين ؟ الموضوع دا حسسنى بالحرية الداخلية النفسية و انى حرة فى اختياراتى و شال على قلبى مهمات مالهاش لازمة و خلانى أؤدى الواجبات و انا مقتنعة انها واجبات و خلانى حرة فى عمل الفضل اعمله لما يكون عندى الرغبة فقط اتعلمت اقول (لأ ) معذرة مش هقدر أعمل كذا اتعلمت أقدم التضحيات او العطاءات بارادتى انا من غير ماحد يفرضه علىّ و من غير ما يبقى واجب و باعمل الواجبات بارادتى و قرارى و انا مبسوطة و سعيدة #دعاء_راجح #الثقة_فى_النفس