كيف ننمى القدرة على التحكم الداخلى داخل أولادنا ؟ الطفل فى أوائل سنين… — تقدير الذات ( دعاء راجح ) — TG.ME

كيف ننمى القدرة على التحكم الداخلى داخل أولادنا ؟ الطفل فى أوائل سنين حياته مجرد "مقلد" بيقلد الابوين فى تصرفاتهم و بيعرف الصح و الغلط من مشاهداته أكتر بكتيييير من الى بيتقال له بعد كدة بيخرج للمجتمع و المدرسة و النادى ممكن يقلد زمايلة او مدرسيه او مدربيه بس لازال الابوين و تعليماتهم هى الحاكمة عنده ما يغرس فى الطفولة من مبادىء و قيم هى الى غالبا بتستمر معاه على مدار حياته الطفل ممكن يقلد من غير ما يفهم ليه دا صح و ليه دا غلط لكن ارتباط الفعل بقيمة زى قيمة النظام او الصدق او الامانه او العطف او الاحسان بيخلى القيمة نفسها تثبت فى مخه اكتر و بيكوّن عنده الضمير الى بيفضل حاكم لتصرفاته بعد كدة التركيز مع الطفل انه يعمل الصح أى كانت الضغوط الى حواليه دا بيخليه يكتسب هذا التحكم الداخلى مثلا : قيمة الأمانة لو غرسناها كويس عند الطفل من صغره و رفضنا الغش حتى لو الفصل كله بيغش و حتى لو جاب درجات كويسة بالغش الامهات دلوقت بتروح تتخانق مع المدرسة لو اللجنة صعبة و لم يسمحوا بالغش قيمة الصدق لو غرسناها كويس فى الطفل مش ممكن هيكذب مهما حصل حواليه لكن لو شاف فى حياته اب او ام بيكذبوا او شاف ان الى بيكذب ينجو من العقوبة او ان الكذاب بيثاب و بيتصدق عادى القيمة نفسها هتتهز و هيبدأ يتبنى الكذب احيانا لو هينجيه من موقف مخيف او محرج و هيتعلم انه يقول الصدق او الكذب حسب المواقف قيمة النجاح لو شاف طول عمره النجاح للابوين هو الدرجات ممكن يغش علشان يجيب درجات و يرضيهم لكن لو قيمة النجاح ارتبطت فى ذهنه بالمثابرة و الاجتهاد اى كانت النتايج هترسخ جواه القيمة و هيتعلم انه يجتهد و يثابر مهما كانت الظروف الى حواليه لو البيئة المحيطة كلها بتعمل حساب الناس و كلام الناس و رأى الناس و الناس هتشوفنا ازاى و هتقول علينا ايه هيفضل طول عمره ماشى على حسب مايرضى الناس ترسيخ المبادىء فى نفس الطفل و انه يتعرض لخبرات تؤكد له ان المبادىء دى هى الصح و انه يمشى عليها فى تصرفاته مهما كانت العواقب بتخلى الطفل يكتسب مع الوقت التقدير لذاته و الاحترام لمبادئه و لأفكاره و يبدأ يكون عنده التحكم الداخلى الى ماشى على المبادىء و القيم الداخلية #دعاء_راجح