ازاى اعتذر عن التواصل ؟ مهم جدا الناس يعرفوا انك مش حاضر دايما… — تقدير الذات ( دعاء راجح ) — TG.ME

ازاى اعتذر عن التواصل ؟ مهم جدا الناس يعرفوا انك مش حاضر دايما للتواصل وانك عندك حاجات تانية فى حياتك مهمة برده فيتعودوا انك احيانا مش بترد على الموبايل سواء تليفون او رسايل و دا العادى بتاعك مهم الناس يعرفوا انك مش جاهز لاستقبالهم فى اى وقت و ان وقتك ملكك و الزيارة محتاجة موعد سابق لما حد يتصل او يبعت رسالة رد عليه او أعد الاتصال لما تكون انت جاهز مش فى الوقت المناسب ليه هو بس لو بتتكلم او قاعد مع حد هتقوله بمنتهى الاحترام معذرة مضطر أقفل معاك دلوقتى أو مضطر أقوم دلوقت حتى لو بدون ابداء أسباب لو التانى قريب منك اوى و من حقه يعرف الاسباب ماشى احنا للأسف مجتمعات " عشرية " و فى رأيى الخاص "حشرية " ممكن نقتحم حياة بعض كدة بمنتهى الاريحية و نقول على دا عشم و للأسف معندناش برده احترام لقيمة "الوقت " مفيش احترام لأوقات الآخرين و حياتهم انا عاوز اكلمك دلوقت يبقى لازم تكون حاضر يا اما أزعل و اتقمص انا عاوز اجيلك دلوقت يبقى لازم تكون جاهز حتى لو انت متضايق و متضرر انا عاوزك تنزل معايا دلوقت يبقى لازم تنزل دون اعتبار لانك ممكن تكون مشغول او حتى مش جاهز نفسيا ربنا سبحانه و تعالى بيقول : فَإِن لَّمْ تَجِدُوا فِيهَا أَحَدًا فَلَا تَدْخُلُوهَا حَتَّىٰ يُؤْذَنَ لَكُمْ ۖ وَإِن قِيلَ لَكُمُ ارْجِعُوا فَارْجِعُوا ۖ هُوَ أَزْكَىٰ لَكُمْ ۚ وَاللَّهُ بِمَا تَعْمَلُونَ عَلِيمٌ (28) كنت زمان أجد هذه الآية ثقيلة جدا على النفس ازاى اروح ازور حد و يقولى ارجع فارجع من غير ما ازعل بس لما كبرت و فهمت ان من حقى اعمل كدة تماما و ان دا لان ربنا عاوزنا نحترم وقت بعض و حياة بعض و خصوصيات بعض و فى الزمن دا محدش بقاله عذر و ممكن يتصل و ياخد موعد مناسب احترامنا لنفسنا ووقتنا و مسئوليتنا و حياتنا بيخلينا نقول لا للتواصل لو مش مناسب لى و برده احترامنا للآخرين ووقتهم و مشغولياتهم و حياتهم تخلينا لانقتحم عليهم فى اى وقت و نستأذن كمان و نقبل الاعتذار لو مش مناسب ليهم انا عارفة ان كلامى دا ممكن يثير اعتراض كتير لان دا خلاف ما تعودناه فى مجتمعاتنا بس دا محتاج حسم و حزم فى تطبيقه مع كل الاحترام و التقدير لمشاعر الآخرين أنا مقدر جدا انك عاوز تتكلم دلوقت بس دا مش الوقت المناسب لى انا متفهم جدا انك عاوز تخرج معايا بس معذرة مش هقدر النهاردة انا شاكر جدا جدا زيارتك دلوقت بس للاسف الوقت مش مناسب الناس هتزعل انا معاك لكن اصرارك على فرض حدودك بيخليهم يتعلموا و يتعودوا على كدة مع الوقت ولو مش هتقدر اعمله مع العلاقات الجديدة و اتعود عليه مع الناس الى مش قريبين اوى و بعدين اعمله بالتدريج مع علاقاتك الحالية دا هيخفف عليك كتير من الضغط النفسى الى عامله الناس على بعض و الى انت عامله فى نفسك انك لاااااازم تكون حاضر فى أى وقت و مستعد للتواصل دا أحد أسباب التوتر الى عايش فيه الناس بعد دخول الموبايل حياتهم #دعاء_راجح