*عقلية التميز: كيف تخرج من منطقةالراحة؟* 🤔
في كل مرة بنحاول نعمل فيها حاجة جديدة، بيظهر الصوت المزعج داك داخل رؤوسنا: "طيب لو فشلت؟" يمكن ما أنجح.
"يمكن الناس تضحك علي."
"يمكن أتعب وفي النهاية ما أصل."
الصوت ده هو السبب البخلي كتير من الناس قاعدين في نفس المكان لسنوات، ما عشان هم ما قادرين على التقدم،
بل لأنهم اختاروا الأمان على النمو، أختاروا يكونوا في منطقة الراحة على خوض التجربة.
* طيب شنو هي منطقة الراحة؟
منطقة الراحة (Comfort Zone) هي المنطقة البتكون فيها مرتاح، وبتعمل الحاجات الروتينية المعتادة، وبتعيش وسط الأشياء المألوفة بالنسبة ليك. دماغك مرتاح، وجهازك العصبي هادئ، لكن في المقابل ما في نمو حقيقي حاصل في حياتك ولا توسع في حدود قدراتك.
* طيب ليه الخروج من منطقة الراحة صعب؟
لأنه لما نفكر نعمل حاجة صعبة، مخنا مرات بيشغل وضع البقاء (Survival Mode)، وبيحاول يرجعنا للمكان الآمن والمألوف. ما لأنه ضد نجاحنا، لكن لأنه مبرمج يحافظ علينا ويجنبنا التوتر والمخاطر.
لكن المشكلة إن النمو الحقيقي غالبًا ما بيحصل في الأماكن المريحة.
* خطوات عملية للخروج من الراحة.
أولًا 📍: حدد خوفك.
اسأل نفسك:
أنا خايف من شنو بالضبط؟
من الفشل؟
من التوقعات؟
من كلام الناس؟
ولا من إني أجرب وما أصل للنتيجة البتمناها؟
لأنك لما تعرف مصدر خوفك، بتكون قطعت نصف الطريق نحو التغلب عليه.
ثانيًا 📍: ضع أهدافًا وخططًا بتحمسك.
اتعلم مهارة جديدة.
جرب هواية ما حصل جربتها.
اقرأ كتاب معين.
شارك في تقديم برزنتيشن.
أو حتى ابدأ مشروع صغير بتحبه.
المهم إنك تمشي خطوة خطوة تجاه أهدافك
ثالثًا📍: قيّم نفسك وحفزها بعد كل خطوة.
اعترف بتقدمك مهما كان بسيط. ما تستنى الإنجاز الكبير عشان تفرح بنفسك. كل خطوة لقدام تستحق التقدير.
ويمكن تحقق أهدافك وترجع تاني لمنطقة راحتك شوية، وده شيء طبيعي.
من حقك تستمتع بالإنجازات العملتها وترتاح بعد التعب و تنطلق مرة اخرى بأهداف أسمى .
*ختاماً*
هل هي صعبة؟ أيوة.
هل دا هو الطريق المفروض تمشيه؟ أيوة.
وفي النهاية، تذكر دائمًا:
كل شيء تعتز به اليوم كان يومًا ما خارج منطقة راحتك.
# stepping_ outside _comfort_zone
# FMSG
# تجمع_طلاب_صناع_المستقبل
