لازم يكون عندك كمية حلوة من الـ«لا أدري».
ومو بالضرورة كل رأي تعرفه تكوله، مو خوفًا، وإنما لأن رأيك هذا مو متأكد منه 100٪، ويشكل غالبًا نظرتك الخاصة، اللي مو بالضرورة تفرضها على غيرك. طبّقها وعيش بيها.
ومو بالضرورة كل الناس تعرف إنك مع أو ضد نقل الأعضاء، أو حقوق المثلية، أو اعتقاداتك الدينية والمذهبية الخاصة، سواء چنت سني، أو شيعي، أو ملحد.
العالم مو بالضرورة محتاج رأيك.
مو بالضرورة تضايق صديقك المخالف إلك بالفكر أو بآرائك الجهنمية. حافظ على صداقته ولا تخسره، لا تخسر الحي لأجل الميت.
مو بالضرورة تكتبلي إنك ناشط مدني ومساهم كمتطوع بكذا مؤسسة حتى تعرّفني إنك خيّر وملاك.
تذكر أن أكو عالم كامل داخلك، حاول تطبق القوانين اللي تؤمن بيها عليه. شايف الصلاة عمود الدين إلك؟ مالك دعوة بغيرك.
فاسترخي وارتاح… وعيشوها ببساطتها.
ليش تصعّبونها على أنفسكم وعلى غيركم؟
