وين تلفونك الما شلت منه نايلون الشاشة ؟
وين تلفونك الجنت شادله كفر ابو البراغي ؟
وين سيارتك الي غلفتها مشمع ؟ وين دراجتك الي غطيتها بدوشمه ؟
وين الريموت الي اشتريتله حافظة ؟ وين حذائك الجنت ما تلبسه تخاف عليه ؟
وين فلوسك الي جنت تجمع بيهن قبل و قبل و قبل اخر مرة
عيش خويه عيش و استمتع بالموجود عندك و اصرف بس لا تبذر
واذا اكو شي بنفسك ما تكدر تجيبه ،، حاول تجيب اشياء ثانية اقل منه لما توصل لذاك الشي
و اذا ما وصلتله يطبه عرج ،، ما لازم
لا تحرم نفسك من شي ما دامك تحتاجه و ما دامك تكدر تجيبه
الخطط البعيده بالزمن حلوة بس ما مضمونه
ما تعرف ضروفك شتندار بين يوم و ليلة للأحسن لو للأسوء
يجوز باجر لو عكبه يدوسك لو يدوسني لوري محمل تبن
لو مراهق بايگ سيارته ابوه الضهر و تفلت من ايده
لو معىِدي يرمي بعرس لو فاتحة لو طهور و تنزل علينه
و المشروع الي براسك و عندك فلوسه افتحه ،، ؏ الاقل اذا ما نجح ؟ راح تتعلم درس
و تبلش تحظر لمشروع ثاني تعوض بي ،، و كذلك الثالث و الرابع
و العائلة قبل الكل ،، حاول تسعدهم من الجبير للصغير شكد ما تكدر حتى لو بشي بسيط
و صاحبك الما تنفعه و ينفعك لا تعوفه ،، بس لا تماشيه هواي ،، حط حدود لعلاقتكم
و لا تنسى ،، اذا تحس روحك فاشل ؟ شوف شنو اكثر شي تقضي بس وقتك ؟
هو هذا سبب فشلك ،، بس تغيره يتغير وضعك للأحسن
