واقع مرير 💔
في الصيدلية راه يجيني وحد النوع من الوصفات لي ما كنتش نشوفو من قبل
يجي شيخ كبير فوق 60 سنة و مظاهر التعب و الارهاق باينة على وجهو
الحالة المادية تاعو باينة مش عالية المستوى
بالعكس تكون تحت المتوسط أو ضعيفة
و فوق هذا ملامح الحزن و الكآبة تغطي وجهو
يبان تالفتلو حاير مهبط راسو و مش قادر حتى يتكلم
يجي عندك للصيدلية رافد الوصفة و عندو أمل العلاج
كي نحكم الوصفة نلقاها تاع وليدو يقولي كاين دوا نقولو ايه كاين
و من أول لمحة للوصفة نعرف المشكل؛ باش ما نزيدش عليه نحسسو بلي الأمر عادي و نجيبلو الدوا
و لي تزيد تقسملك قلبك كي تشوف السن تاع وليدو
16 سنة و مرات 20؛ المهم ما يفوتش 23
الوصفة فيها علاج الإدمان على المخدرات و هذا العلاج عادة ما يفوق 500 الف و الاب يخلصها دون تردد
كي شغل يقلك معليش المهم وليدي يتعافى
نسقسي الأب بعض الأسئلة باش يحكي و يفرغ واش راه يحس ممكن نقدر نقدملو نصيحة
في نفس الوقت نقلك انت كمدمن؛ راك في مقتبل العمر و الحياة قدامك؛ مهما كانت الظروف التغيير راه بيدك و واش راك تدير الان هو لي يحدد مستقبلك و حياتك كيفاش راح تكون
اما للأفضل أو للأسوأ
لازم تتعلم؛ تخدم؛ تحاول؛ تقدر تغير حياتك رأس على عقب و مهما كانت الظروف والديك والله ما يستاهلو هذ الشي؛ بالعكس هوما عندهم أمل فيك أنك تعاونهم و ترفدهم مش تطيحلهم صحتهم و تعبهم معاك ....
منقول
16
8November 6, 2025 729 1
