من چنت أتدرب، چنت أفكر: من أتخرج شلون راح ألزم تواجد؟ أخاف من فكرة إني ممكن أخطأ بعلاج مريض، أو شلون أضبط علاجات الصيدلية من حيث أماكنها وتسعيرتها وغيرها من تفاصيل الشغل.
فمرة سألت صيدلانية كانت متواجدة وياي بفترة التدريب عن الموضوع، گالتلي: "أني من أول يوم إلي بالصيدلية، لزمت شفت بوحدي".
هنا حسيت أنو عندي خلل .
لأنّ بعدني غير مدركة لأمور الشغل، فهالكلام انطاني فكرة غلط عن نفسي وعن مدى جاهزيتي.
بس خلال وجودي بشفتها، چنت ألاحظها كل شوية تتصل بالـOwner وتسأله عن مكان علاج معين، سعره ، او صرفه، فعرفت أن اللي گالتلياه مو مطابق للحقيقة، وأن هذا الشي طبيعي جداً يصير ويا أي شخص يكون جديد على المكان؛ محد يدخل أول يوم وهو يعرف كل تفاصيل الشغل.
فماله داعي ادعاء المثالية على شخص أقل منك سنًا، خصوصًا إذا أنت بنفسك بديت من الصفر.
بعد التخرج، الموضوع طلع مختلف تمامًا عن الصورة اللي چنت راسمتها براسي. كان أسهل من ما تخيلت، ومجرد ما كسرت حاجز الخوف، بديت أكتشف أن هواي من الأمور تنفهم بالممارسة.
بعدني أدرس وأتعلم من أخطائي كل يوم، وكل يوم أكتسب خبرة أكثر.
بس شعوري بذاك الوقت ما أنساه؛ لأن أحيانًا كلمة وحدة من شخص أكبر خبرة ممكن تخلي الواحد يشك بنفسه، وهو أصلًا بس يحتاج يعرف أن اللي يمر بيه طبيعي.
فالشخص اليوم، من يتمكن من شي، لا يسوي نفسه "عنتر زمانه" على الجدد؛ لأن هو همين بلش من الصفر، وما صار عنده كل هالخبرة بيوم وليلة.
