📜 القصيدة: مجمر دليلي
🎤 أداء: مسلم الوائلي
🖋 كلمات: حسن الترابي
~~~~
يحسين اجيتك محترگ..مجمر دليلي من العشگ
بعيوني شايل كربله..ومعزب بصدري السحگ
حسين يا أبا عبدالله..حسين يا أبا عبدالله
~~~~
ساجيني حزنك ونصلب شفه اعله بيبان العطش
يرسملي طولك عالترب بحوافر الخيل انفرش
شلون بحصيره تنجمع ماكو اعله گد طولك نعش
هم لموا من الداستك لو ضاعن بليل اهدعش
ما بارحت حزنك يوم..ولا لاگت عليه هدوم
كل عمري خلص كربله..وغربة بنات مدللة
حسين يا أبا عبدالله..حسين يا أبا عبدالله
~~~~
كل خطوة تگضي من الدرب نتسامر بعين الدمع
سولفلي عنك بالسحگ راح بسنابكهم ضلع
بعيونك مكابر عطش يلمنذبح ذبحت شمع
من ثوبي وياك استحي عريان أشوفك منصرع
يحسين يا حزن الله..مسلوب ثوبك غفله
من ثوبك المسلوب أمس..يبدي الستر يابو الشمس
حسين يا أبا عبدالله..حسين يا أبا عبدالله
~~~~
وازه السمه من علرمح راسك يبن حيدر صعد
بدم شيبته توضه العرش والقبلة عيونك سجد
بس انت يحسين وجذب يشمخ نخل عالگاع ابد
من عينك لحد عينك ومامش وره عيونك بعد
راسك بلرماح يبات..ويسگي بضواه النجمات
بس انت بعيوني العشگ..والباقي غربه اعله الصدگ
حسين يا أبا عبدالله..حسين يا أبا عبدالله
~~~~
من غربة ضنونك بدت كل المواسم والسفر
ليل وحزن يشرب حزن والغربه لجمات وسهر
شما يمحل بروحي العشگ يسگيني من عندك مطر
وذكر عطش گلبك وحن ولتم رذاذ اعله نحر
ماي اعله گلبك ياريت..اتبده كون تمنيت
بلكي الله تبره من الضمه..وعيونك أتلم السمه
حسين يا أبا عبدالله..حسين يا أبا عبدالله
~~~~
يمتد علينه فيايك ونلتم حدر في العشگ
بعيوني اعرف طولك مطشر حدر خيل السحگ
ياخذني يحسين الهظم وهجر صحبتي واحترگ
كل ما شفت ماي السبيل اعله الدرب حيل اختنگ
عطشان وبلايه فياي..عمت عيني وانه أشرب ماي
منومني بفياي الخيم..ومنوم بگلبك سهم
حسين يا أبا عبدالله..حسين يا أبا عبدالله
°°°°°°°°°°°°°°°°°°°°°°°°°°°°°°°°°°°°°°
November 22, 2021 49.2K 946
