يرجليه يرجليه باجر ع الجمر تمشن يرجليه
يرجليه يرجليه باجر راية العباس ماهيه
,,,
يرجليه الطريج بعيد شدن حيلجن باجر
باجر من بعد عباس زينب تكسر الخاطر
ركض من الخيم لحسين من ينداس بالحافر
ونركض للشريعه نروح يم الفاگد الناظر
بالحر والظهر نطلع. ركض من مصرع لمصرع
وباجر تنوخذ من عدنه ترجيه ,, وباجر ع الجمر تمشن يرجليه
ــــــــــــــــــــــــــــــــــــــ
باجر من تجيني الخيل اركض ع الجمر حافي
وعباس اليجيب الماي بــــاجر ع النهر غـــافي
باجر يهد حيلي الصوط من يلتف على جتافي
وجتـال اخوتـي الحداي يشتد لــوگلت كــافي
باجر شامت يسبني. وكل ماحشم يطگني
وحماي الظعون عيونه مطفيه ,,, باجر ع الجمر تمشن رجليه
ــــــــــــــــــــــــــــــــــــــ
يرجليه الصبح لو صار وين نروح ماادري
ونار البالخيام تگوم بذيال العباه تسري
ومابين الخيم وحسين باجر ينشده فكري
وايس من اخوي انوب اروحن للكفل خدري
باجر مايظل زلمه ,,, بيجن للركض همه
واركض حافيه وبالنار مجويه ,,, باجر ع الجمر تمشن يرجليه
ــــــــــــــــــــــــــــــــــــــ
باجر كل زلمنه تــروح راح نظل لوحــدنه
باجر يذبحون حسين والعباس مو يمنه
ونركض ع الجمر حفاي من تتفرهد خيمنه
باجر نطلع وننشاف بعيون الغرب كلنه
كلهم ع الرمل نومه ,, نحشم مالهم گومه
باجر تنضرب بالسوط علويه ,,, باجر ع الجمر تمشن يرجليه
ــــــــــــــــــــــــــــــــــــــ
باجر من يطيح حسين اريدنجن تعينني
كون يصير بيجن حيل للمصرع توصلني
من نشوف اخوي يلوج خافن ماتشيلني
ومن يمه لعد عباس يــارجليه ودنــــي
من عباس لبن امي. اركض والجدم مدمي
اگومن وانهطر ومتوني مدميه ,,, باجر ع الجمر تمشن يرجليه
ــــــــــــــــــــــــــــــــــــــ
كون يطول بيه الليل ماريد الفجر ينطـر
يوم البي هلي يشيلون ياذاك الصباح اكشر
اودعمن بذاك اليوم جاسم لو علي الاكبر
ومابين الزلم والخيل چم علويه تتعثــر
يفترن خوات حسين ,, مايدرن يروحن وين
بيد اجناب والوليان ماهيه ,,, باجر ع الجمر تمشن يرجليه
ــــــــــــــــــــــــــــــــــــــ
اوصيجن تشدن حيل مدري متوني اوصيهن
مثلجن ينولــن بــاجـــر وليــه وحيل مــابيهن
خولــه وحــرمله بالســوط يجرن دم يخليهن
وخواتــي ابين خيــل ونــار يتعثـرن بعبيهــن
هذا يطگني بمتوني. وذاك اليسطر عيوني
متحيره بحرم والعين معميه ,,, باجر ع الجمر تمشن يرجليه
رائد الناشي
