- أَثَرُ العِلْم || 𝗔𝗰𝗮𝗱𝗲𝗺𝘆 .

6/17
8/17

نصائح لدفعة 2027 (الثالث المتوسط) 🌷
هاي مجموعة أشياء سويتها بالثالث، أقيمها وأنصحكم شتسوون بدلها:
1- قريت بالعطلة
التقييم: 2/10
أبدًا ما أنصح بيها، لأن أغلب المعلومات راح تنسوها بسرعة. بالعطلة فقط تراجعون أساسيات كل مادة فقط وبالفيزياء أنصح بفيديو أساسيات الفيزياء للأستاذ منتظر الخفاجي، راح يفيدكم بالمسائل.

2- أركز على الامتحان الشهري وأهمل التحاضير
التقييم: 0/10
لا تسوونها. التحاضير إذا تراكمت راح تتعبكم طول السنة، وبالنهاية لا بالتحاضير تخلصون ولا بالامتحان تجاوبون زين.

3- أراكم المواد وأگول أقراها بيوم الخميس
التقييم: 3/10
ما تفيد أبداً ... يوم الخميس غالبًا تكون طاقتكم قليلة بعد أسبوع كامل فخلوه يوم خفيف أو للراحة ولا تعتمدون عليه حتى تخلصون كل التراكمات.

4- اشتريت ملازم لكل المواد (عدا الإسلامية)
التقييم: 10/10
اختصرت عليّ هواي وقت أغلب المواد قريتها من الملازم أما الإسلامية والاجتماعيات فاعتمدت بيها على الكتاب والحمد لله جبت 94 بالاجتماعيات، و91 بالإسلامية والعربي.

5- اشتريت سجلات كبار
التقييم: 4/10
ما أنصح بيها، لأن ثگيلة وتتعب بالحمل الأفضل دفاتر كبار عادية.

6- نومي جان مو منتظم
التقييم: 1/10
النوم المنتظم من أهم الأشياء راح يحسن تركيزكم وحفظكم وحتى نفسيتكم.

7- أبچي بعد كل امتحان 😂
لا تبچون ولا تنقهرون على أي درجة الدرجات المدرسية مو مقياس حقيقي لمستواكم والأهم تتعلمون من أخطائكم وتكملون.

8- ما حليت وزاريات أثناء الدوام
التقييم: 0/10
غلط. تعبت كلش بفترة المراجعة لأن جان لازم أطلع الأسئلة والأجوبة من الصفر. حلّوا الوزاريات أول بأول.

9- لا تهملون أي مادة
التقييم: 10/10
أبدًا أبدًا لا تهملون أي مادة، حتى إذا ما عندكم بيها مدرس، لأن راح تتراكم عليكم، وبالأخير تتحسرون عليها مثل ما صار وياي.

ملاحظة أخيرة 🤍
مو مطلوب منكم تطلعون معدل عالي، الثالث المتوسط مرحلة عادية جدًا أهم شيء تنجحون وتنتقلون للإعدادية أني حتى بفترة المراجعة جنت أگول: "يارب بس أجيب معدل 50." 🤣 والحمد لله بالنهاية جبت معدل 80، فما تعرفون يمكن تطلعون أحسن من توقعاتكم.
وأخيرًا:
لا تضغطون على نفسكم أكثر من اللازم، التزموا بالدراسة أول بأول، وارتاحوا، ونظموا نومكم، وإن شاء الله تشوفون نتيجة تعبكم. بالتوفيق الكم ♥🫧.