#duo
📜Муножот
Шайх Саид Рамазон Бутий раҳимаҳуллоҳнинг дуоларидан
Аллоҳим! Сенга ҳамд бўлсин, ёлғиз Сенгагина шикоят қиламиз, Сендангина ёрдам сўраймиз ва Сенгагина суянамиз. Ъалийм ва Азийм Аллоҳдан ўзга куч ва қувват йўқдир.
Аллоҳим! банданг ва пайғамбаринг Муҳаммадга охиргилар ичида ҳам, қиёмат кунигача Малаул Аълода ҳам салавот йўллагин.
Аллоҳим! бизнинг номимиздан саййидимиз Муҳаммад соллаллоҳу алайҳи васалламнинг руҳларига салом ва дурудларни етказгин. Аллоҳим, у зотни кўрмасдан имон келтирганимиздек, жаннатда у зотни кўриш бахтидан бизни мосуво қилмагин, эй зул Жалоли вал Икром.
Аллоҳим! Сендан қазодан кейинги ризо, розиликни, ўлимдан кейинги яхши ҳаётни ва Жамолингга муштоқлик лаззатини сўраймиз, эй оламлар Раббиси!
Аллоҳим! Бу оламдан кетар вақтимиз келганда, дунёни ва ундаги барча нарсаларни кўзимизга ёқимсиз кўрсатиб, Сенинг лиқоинг, дийдорингни бизга суюмли қилгин. Қалбларимизни Сенга бўлган шавқ, соғинч билан тўлдиргинки, токи бу иштиёқимиз ўлимнинг оғирлиги ва азобларини енгиллаштирсин, эй оламлар Рабби.
Аллоҳим! Сендан севгингни, Сени севганларнинг севгисини ва Сенга яқинлаштирадиган амалларнинг севгисини сўраймиз. Эй Раббим, Сендан розилигингни ва жаннатни сўраймиз, ғазабинг ва дўзахдан паноҳ тилаймиз.
Аллоҳим, биз учун нимани ҳукм қилган бўлсанг, яширин лутфинг ва раҳматинг билан унинг оқибатини хайрли ва тўғри қилгин, эй зул Жалоли вал Икром.
Эй бир эшитиши бошқа эшитишдан чалғитмайдиган, сўровларнинг кўплиги адаштирмайдиган ва сўровчи бандаларнинг илтижоларидан асло малолланмайдиган Зот!
Сен танҳолигимизда ҳамроҳимиз, умидсизлигимизда суянчиғимиз, ҳар бир мусибатда эвазимизсан. Бизни раҳматинг соясидан ҳайдамагин, эй оламлар Рабби, эй зулЖалоли вал Икром, бизга эҳсонинг ва лутфинг салқинлигини тоттир.
Аллоҳим, бизга фойдали илм бергин, берган илминг билан фойдалантиргин ва илмимизни зиёда қилгин.
Бизни Ўзинг рози бўладиган нарсаларда мустаҳкам қил ва ёрдам бер, эй оламлар Рабби.
Аллоҳим, юртимизни унинг дини ёки дунёсига ёмонлик истаган ҳар бир кимсадан поклагин, эй Зул Жалоли вал Икром.
Эй, Зул Жалоли вал Икром, эй мурувват ва инъом эгаси! Муборак замин устида яшаётган бандаларинг қалбига тинчлик, хотиржамлик ва фаровонлик қувончини Ўзинг хоҳлаган тарзда қайтаргин, эй оламлар Рабби.
Аллоҳим, агар биз дуоларингга ижобат бўлишга лойиқ бўлмасак, Сен бунга лойиқсан. Сен: «Ҳар ким ўз ҳолича (шакли-шамойили, феълига) кўра амал қилади» деб айтган Раббимизсан.
Сенинг феълинг — раҳмат, сенинг феълинг — мағфират, сенинг феълинг — кечиримдир, эй зул Жалоли вал Икром,. Бизни гўзал кечирим билан кечиргин.
Аллоҳим, бизни то тирик эканмиз, эшитиш, кўриш ва жисмоний қувватимиздан баҳраманд қилгин ва буларни бизга охиригача ҳамроҳ қилгин.
Аллоҳим! Ким Ислом ва мусулмонларга хайрихоҳ бўлса, унга барча яхшиликларда тавфиқ бер. Ким Ислом ва мусулмонларга ёмонлик раво кўрса, эй осмонлар ва ернинг Қоййуми, эй зул Жалоли вал Икром, уни Азиз ва Муқтадир Зотнинг ушлаши ила ушлагин.
Аллоҳим! Биз Сенга сочлари тўзғиган, чанг-тўзонга беланган, камтар ва фақир бандаларингнинг дуолари билан тавассул қиламиз. Агар улардан бирортаси Сенинг номинг билан қасам ичса, албатта, унинг қасамини рўёбга чиқарган бўлар эдинг.
Эй Раббим, ушбу соатда дуоларимизни ижобат қилишингни ва умидларимизни рўёбга чиқаришингни сўраймиз. Эй оламлар Рабби, ушбу соатда ҳар биримизга Сен рози бўладиган сўраган нарсаларимизни бергин.
Эй, омонатлар Унинг ҳузурида зое бўлмайдиган Зот! Биз Сенинг бандаларингмиз, дуо ва умидларимизни Сенга омонат топширдик, орзуларимизда бизни ноумид қилмагин.
Саййидимиз, Набиййил уммий алайҳиссаломга, қадри баланд ва жаноби улуғ бўлган Муҳаммадга, уларнинг оила аъзолари ва барча саҳобаларига Аллоҳнинг салавотлари бўлсин.
Омин, омин, омин. Оламлар Рабби - Аллоҳга ҳамдлар бўлсин.
@arabicuz
iOS | Android
Instagram | Facebook | Twitter | Tiktok | Youtube
10
