Panpanʼs mystery

#vikimedia
Disclaimer: Avvaldan mavzuga oydinlik kiritsam, bu yerda gap Vikimedia misoli ostda umumiy volontyorlikka qaratiladi va men mavzuni oʻzim uchun koʻproq maʼlum boʻlgan Vikimedia misolida tahlil qilaman.

Nega Moddiy manfaat keltirmaydigan loyihalarda qatnashish kerak?
Vikimedia muhiti volontyorlik harakatlariga asoslangan va odatiy holatda sizning bu muhitdagi mehnatingiz uchun pul toʻlanmaydi. Yaʻni moddiy ragʻbat yoʻq

Moddiy ragʻbat yoʻq ekan unda tahrirlashdan nima naf, uning oʻrniga foydaliroq ish qilaman deydi koʻpchilik. Lekin Vkimedia tahriri ham sizning foydangizga ishlashi mumkinligini baʼzida unutib qoʻyasiz. Hozir ana shu koʻzga koʻrinmas foydalar haqida gaplashamiz.

Vikimedia harakatidagi faoliyatlar, masalan, Vikipediyada maqola yozish/tahrirash, Vikiiqtibosda tahrirlar qilish, Vikiomborga surat yuklash, Vikilugʻatni yangi soʻzlar bilan boyitish, bularning barchasi oʻz oʻrnida sizga manfaatli boʻladigan baʼzi narsalarni keltirishi mumkin. Ular orasida eng birinchisi bu xalqaro doʻstlardir.

Mening koʻplab chet el mamlakatlarida xalqaro doʻstlarim bor va ulardan qandaydir yordam soʻrashim, fikr almashinishim yoki shunchaki gap sotish orqali til bilimlarimni oshirishim mumkin. Bunday doʻstlar doim yoningizda boʻlmasa ham, uzoqda boʻlsa ham sizga qaysidir yoʻnalishda yordam berishi mumkin. Shulardan biri menga qanday grant yutish borasida oʻz tajribalarini oʻrgatmoqda. Sizga ham shunday xalqaro doʻstlar kerakmi?

Ikkinchi foydali tomoni, bu xalqaro sayohatlar. Yevropa vizasini olish qiyin deyishganini eshitganmisiz hech? Schengen hududlari oʻz zonasiga begonalar, ayniqsa Osiyoliklarni shunchaki kiritmaydi. Siz bu uchun oʻnlab hujjatlarni yigʻishingiz kerak, hattoki shunchaki oʻz mablagʻlaringiz asosida sayohatga ketayotgan boʻlsangiz ham. Ammo men oʻzimning ilk schengen vizamni hech qanday qiyinchiliklarsiz va qaytarishlarsiz oldim. Vikimedianing xalqaro konferensiyasi grantini yutishim orqali ular menga barcha hujjatlarni taqdim etishdi, kerak boʻlsa elchixona bilan bogʻlanib amaliy yordam berishga ham tayyor ekanliklarni aytishdi. Xoʻsh siz shunday yordamdan ham voz kechmoqchimisiz?

Bu tanganing bir tomoni, ikkinchi tomonda sayohat uchun xarajatalrning toʻliq qoplanib berilishi turibdi. Men hech qachon ham oʻzim xohlab, Afrikaga oʻz mablagʻim asosida bormagan boʻlar edim. Ammo Wikimedia menga shu imkoniyatni berdi. Men grant yutdim va ortiqcha pul ishlatmay Afrikaga borib keldim. Qoʻshimchasiga Vikimedia hamjamiyati stidpendiya sifatida qoʻshimcha pul ham berishdi. Shunchaki tekinga qilingan mehnat evaziga sizga tekin sayohat chiptasi va qoʻshimcha pul taqdim etilmoqda. Mazza emasmi?

Uchinchi sabab, bu biroz moddiyatga yaqinlashgan sabab. Yaʻni tanlovlar va oromgohlar. Vikimedia harakatining loyihalari yil davomida tanlovlar oʻtkazadi. Ularda qatnashib ham pul mukofoti yutish mumkin, aniqrogʻi pulli vaucherlar. Shuningdek, yuqorida aytilgan xalqaro doʻstlaringiz orqali chet eldagi oromgohlarda ham qatnashishingiz mumkin. Shu yil oʻzbekistonlik tanishlarimning koʻplari Ozarbayjondagi oromgohda qatnashishdi va ishonavering bu haqiqiy mazza.. Garchi bora olmagan boʻlsam ham buni suratlardan his qildim. Agar siz ham faol tahrirchi boʻlsangiz chet elliklar oʻzlari sizni oromgohlarga taklif qilishadi va siz chet ellik muhtaram tahrirchi sifatida gerdayib oʻtirasiz

Endi ham nega Vikimedia loyihasida tekinga tahrirlashim kerak deb oʻylayapsizmi? Agar fikringiz oʻzgargan boʻlsa harakatni boshlang. Oldinda oʻnlab konferensiyalar va yuzlab tanlovlar sizni kutmoqda. Sovrini boʻlganidagina qatnashib, yutuqsizlarini oʻtkazib yuborishga shoshilmang. Koʻplab konferensiyalar aynan yutuqsiz loyihalarda ham faollik koʻrsata olganlarga koʻproq eʻtibor qaratadi. Sababi ular haqiqiy volontyor va tekin sayohat chiptasiga arziydi.

Men sizga oʻz sabablarimni aytdim. Sizda Vikimediada pulsiz tahrirlashga undaydigan qanday sabablar bor. Ularni izohlarda yozib qoldiring, balki bu yangi Vikimediachilar uchun motivatsiya bera olar.

@panpan_mystery