#منقول
السلام عليكم
بالنسبة للمقبولين في البورد العربي لهذه السنة, فالشغلات التي تحتاج تسلمها لسكرتيرة المجلس بالتفصيل (النقاط جوة لفرع الباطنية واعتقد ماكو اختلاف جبير بين باقي الفروع للمجلس العربي)
1. (أ) الامر الوزاري تسحبه من النت وتستنسخه اسود وابيض (اللي يصدر في صفحة الفيسبوك: اعلام الدائرة الأدارية والمالية والقانونية/ وزارة الصحة)
طبعا تحتاج نسخة للانفكاك من دائرتك الحالية ونسخة للمباشرة في دائرة الصحة الجديدة ونسخة لمكتب البورد العربي للمكان اللي راح تداوم بيه عدا النسخة الاهم اللي تنطيها للمجلس العربي (تحتاج 4 نسخ)
(ب) نسخة (مباشرتك في المستشفى + مباشرتك في البورد العربي) احد النسخ لازم بيها ختم المستشفى
2. نسخة ملونة من شهادة البكالوريوس
3. 2 نسخة ملونة من جواز السفر (الغير منتهي الصلاحية)
4. (أ) وثيقة التخرج بالدرجات باللغة العربية معنونة الى (المجلس العربي للاختصاصات الصحية) + نسخة ملونة منها
للحصول عليها تسوي طلب من البورد العربي تعنونة الى الكلية لغرض منحك الوثيقة المعنونة للمجلس (عادة تطلع من 10 ايام الى 2 اسبوع وتختلف من كلية لاخرى)
(ب) تاييد التخرج + استنساخ (ليس اجباري خصوصا اذا عندك الوثيقة) ولكن اذا عندك تاييد سوي نسخة منه وارفقه وية باقي الشغلات
5. 8 صور ملونة حديثة (خلف كل صورة اسم وتوقيع)
6. 490 دولار (300 التدريب السنوي + 40 رسم المجلة السنوي + 150 التسجيل تدفع لمرة واحدة)
مصرف الاستثمار العراقي الفرع الرئيسي
اسم الحساب: المجلس العربي للاختصاصات الصحية
رقم الحساب: 29694
اما تنطي الفلوس لسكرتارية المجلس وتسوي بي وصل (الافضل) او تسوي صك من مصرف الاستثمار الرئيسي بالكرادة.
7. استمارة التسجيل للفرع المقبول بيه, راح تلقى هواية استمارات سواء بموقع المجلس العربي + العربي في العراق
شخصيا سحبت استمارة, طلعت مو هية المطلوبة لذا الافضل تروح للمجلس العربي ببغداد (دار التمريض الخاص) تسحب استمارة من سكرتيرة البورد او تسحب استمارة تسجيل من السنتر اللي انت باشرت بيه
وتملي الاستمارة مع سكرتير او سكرتيرة البورد لان بي شغلات مو واضحة
بنهاية الاستمارة ورقة لازم تكملها, بيها التواقيع من المشرف ورئيس القسم ومدير المستشفى وتاريخ المباشرة
وبعدين اذا الله سهل وكملت ملء الاستمارة تجيبها وية الشغلات الفوك الى المجلس العربي ببغداد (تجيبها باليد افضل من تخلي احد مكانك او تخلي السنتر اللي دامت بيه يدزه بالبريد)
8. 2 فايل ازرق
9. خلاصة خدمة شغلتها يم سكرتيرة البورد وترفق مع المرفقات فوك
يفضل ان تسلم الاشياء فوك سوة لسكرتيرة المجلس قبل 1...11...2018...
المباشرة بالمركز التدريبي قدر الامكان تكون قبل 15...10..2018...
بعد المباشرة اكو شي اسمه logbook اسال زملاءك البوردجية عليها,
تنملي يوميا او شهريا من الطبيب المشرف عليك وتجمع مال سنوات البورد وتحفظه يمك علمود ترسله بالامتحان النهائي
