اثر ماندگار استاد حاج یدالله منعم اردبیلی رضوان الله تعالی علیه
آیا کیمه ظلم ایلدی اصغر قانا باتدی
هم یاتدی او دیلسیز بالا هم حرمله یاتدی
آسوده یاتا حرمله قبرون بوجاغیندا
اصغر اوزی گوز قانلی حسینون قوجاغیندا
آند اولسون اونون قانینه بیر صاحب قان وار
قوی پرده دولانسون نجه باخ گور قان آلان وار
ای شمر ئولوم یوخدی سنه کاموی آلدون
ئولدوردون حسینی باجیسین چوللره سالدون
سعد اوغلونا پاداش ریون ملکی یازیلدی
اوچ قانه باتان میته بیر قبر قازیلدی
چنگیز کی بیابانلاری غرق ایلدی قانه
چکدی جگری پارچالادی دور زمانه
هر کیم بیزه گولسه داش آتا مانعی یوخدور
قلبینده حسینیله یقین کینه سی چوخدور
دشمن گولر البته الیندن گله داشلار
یا قورخا اگر داشلامیا مسخره باشلار
قرآن اوخیاندا نجه که گولدیله باشه
چون گوردیله سوز حقیدی تز باسدیلا داشه
وار بعظیلری تشنه دیلر قانه حسینه
نفرتله باخور تعزیه داران حسینه
هر کیمسه حسین وای دیور افسانه دیوللر
بش گون بو قرا گیمگی ایراد ائلیوللر
ایراد ائلمه دردوه درمان حسیندور
صباح قیامت گونی سلطان حسیندور
جانلار اونا قربان اولا جانان حسیندور
جانین قویوب اسلامه وئرن جان حسیندور
بو قانلاری جوشه گتورن قان حسیندور
بو قاره گینلر هامی قربان حسیندور
هر کیمسه حسین گئتدیگی یول گئتسه بشردور
هر کیمسه او یولدان چخا واللهی خطردور
آند اولسون او اللهه حسین دوز یولا گتدی
غرق اولدی قزل قانینه اسلامی دیریلتدی
آیا نیه گلدی گوره سن کرب و بلایه
آیا نیه سالدی سوسوز اطفالی بلایه
چون گوردی یزیدی دوشنوب باده نابه
آلوده زنائیله لواطیله شرابه
ایستور یخا اسلامون ایوین کاسه داشوبدور
ایلور نه بیلور ظلم داخی حددن آشوبدور
بیر نهضت ائدوب نهضتی سرمشق جهاندور
هر مذهبه هر ملته دنیایه عیاندور
ظلم آلتینا گئتمکلیگی آندیردی جهانه
ظلم آلتنا گئتمز کیشی غرق اولسادا قانه
ظالم او دگل که گزه ظلمون سراغندا
ظالم اودی باشین اگه ظالم قباقندا
گور نیلدی به به او جوشان قانوه قربان
الله نئیمیش بو بئله قربانوه قربان
بیر قانلی جدایه یارالی باشیله چخدی
وردی اوجا یردن ئوزینی تختینی یخدی
سسلندی جدا اوسته او سس دوشدی جهانه
یا شیعتی باتدیم سیزه خاطر بئله قانه
سالدیم اوتا اطفالیمی چکدیم سیزی اوتدان
وئردوم آلا گوز اوغلومی ئوز دینیمه قربان
قویدوم باشیمی سجدیه الله ئوزی بیلدی
باشیم او چوخور یرده نماز اوسته کسیلدی
( منعمدور ) آدیم نوکر دربار حسینم
یوخ یوخ غلط ائتدوم سگ مردار حسینم
@ostadmonemardebili
