في محيط عالم العمل الحر، التسويف ممكن يكون زي الهلب اللي بيثقل سفينتك ويمنعها من الإبحار نحو شواطئ النجاح والإنجاز.
و دلوقتى المشكلة حجمها بقى اكبر من زمان… ليه؟ عشان العالم ماشي حواليك بسرعة الصاروخ, و ضروري دلوقتي اكتر من أي وقت تاني انك تركز.
في مجال العمل الحر، انت بتتمتع بحرية كبيرة و انت اللي بتدير وقتك و بتحدد اهدافك و مسؤول عن انك تحافظ على ارادتك و دافعك الشخصي.
بداية من مرحلة التعلم الذاتي عشان تشتغل فى مجال العمل الحر, مروراً بمرحلة تجهيز البورتفوليو، و التقديم على شغل، و الشغل نفسه، و التعلم المستمر جمب الشغل، كل دي حاجات لو امتزجت بالتسويف هتأثر فى مستقبلك بالسلب بشكل مباشر.
فى البوست ده هتكلم عن استراتيجيات التغلب على التسويف و ازاي تعلي من انتاجيتك فى مجال العمل الحر.
1- حدد اهداف و مواعيد نهائية او deadlines
اول خطوة فى محاربة التسويف هي انك تحدد اهداف و مواعيد لكل حاجة انت ناوي تعملها، زي قبطان السفينة, لازم يحدد المسار و يبقى عارف الطريق اللي هيمشي عليه.
تحديد الأهداف و المواعيد النهائية دي مهارة بتحتاج انك تبدأ تمارسها, يعني فى الأول المواعيد اللي هتحددها مش دايما هتظبط، و مع الوقت، هتبقى ادق و ادق.
لو الهدف كبير, لازم تقسمه لأهداف صغيرة و تحدد معاد لكل هدف فيهم.
2- رتب مهامك حسب الأولويات
زي ما قال ستيفن كوڨي: “المفتاح ليس تحديد أولويات ما هو موجود في جدولك، ولكن لجدولة أولوياتك.”
لازم ترتب مهامك, ركز على الضروري الأول؛ المهمة اللي هيبقالها اكبر تأثير علي اهدافك بشكل عام, او المهمة اللي لازم تتسلم فى اسرع وقت. ده هيخليك قادر انك تستغل وقتك احسن استغلال, لأن من تجربتي الشخصية, اسوأ نوع من انواع الضغط النفسي هو الضغط النفسي اللى فوسط ما انت بتنجز حاجة.
ده بيبقى بسبب انك شغال على مهمة اهميتها اقل من مهمة تانية, و المهمة التانية دي طول الوقت علي بالك مع انك المفروض بتنجز. فلازم ترتب اولوياتك عشان مش حلو انك تبدل التسويف بالضغط النفسي. الضغط النفسي من اكبر العوامل اللي بتخلينا نلجأ للتسويف من تجربتي الشخصية.
3- حدد روتين يومي منظم لنفسك
الروتين المنظم بيخليك مع الوقت ماشي ناحية هدفك بشكل تلقائي. حدد ليومك الوقت اللي هتشتغل فيه, الوقت اللي هتتعلم فيه, الوقت اللي هتريح فيه. صدقوني الروتين اليومي بيساعد كتير.
4- قلل من المشتتات
المشتتات هي من اكبر العوامل اللي بتخلينا نسوف. عشان تزود انتاجيتك و حصيلتك المعرفية, حدد مكان مخصص لده, اقفل الإشعارات على موبايلك و على الكمبيوتر. لو دي مشكلة كبيرة عندك حتى بعد ما تقفل الإشعارات, انصحك تنزل برامج كل دورها انك تعملك حظر من استخدام مواقع التواصل الاجتماعي فى وقت معين
برامج زي Freedom - Cold Turkey Blocker - LeechBlock NG - RescueTime - Forest - FocusMe
و برامج غيرها كتير هتفيدك لو بيواجهك صعوبة في البعد عن تشتيت الموبايل و الكمبيوتر.
5- استخدم طريقة لتنظيم وقتك
- ادارة الوقت بطرق فعالة زي طريقة بومودورو:
طريقة بومودورو هي انك تركز فى اللي بتعمله 25 دقيقة متواصلين و بعدين 5 دقايق من الراحة, و نعمل الموضوع ده 4 مرات متتالية (يعني ساعتين) و بعدين ناخد راحة اطول شوية (ربع او نص ساعة) - فى ناس بتطول مدة ال 30 دقيقة, و في برامج كتير للموبايل و الكمبيوتر هيساعدوك كتير فى تنفيذ الطريقة دي
اعمل سيرش علي Pomodoro technique apps
- تقنية تقسيم الوقت (Time blocking):
تقنية تقسيم الوقت أو "Time blocking" هي تقنية مبنية على جدولة فترات زمنية محددة لكل مهمة أو نشاط خلال يومك. اعمل سيرش و اقرا عنها, مفيدة جدا.
و فالنهاية، افتكر ان زي ما قال لاو تزو: "رحلة ألف ميل تبدأ بخطوة واحدة." بتطبيقك للاستراتيجيات دي، تقدر تتغلب على التسويف وتبحر بسلاسة نحو أحلامك وأهدافك في عالم العمل الحر.
انا هتكلم عن كل نقطة من دول فى بوست مفصل بأمثلة عملية عشان الموضوع كبير و مهم جداً.
شاركوا أفضل نصائحكم للتغلب على التسويف في التعليقات تحت! ⬇️💬
