جيتك يا ديرتي والقلب مشتاق
أسابق اللحظه على الوصل ناوي
تسوقني رجلي من غير سوّاق
أدل دربٍ له البال هاوي
أبعتذر لك عن طول الفراق
لعل عذري عند الغاليه ياوي
عام مضى فيه الفضا ضاق
كني غريب بين الأصحاب خاوي
أفلاجنا نورك على الكون برّاق
وتاريخ مجدك يذكره كل راوي
حبي لأرضك زرعته بالأعماق
واليوم ما ظني على البعد قاوي
ياما حصدنا من زرعها خير دفّاق
وياما ارتمينا في حضنها وقت الملاوي
تظلم بي الدنيا واشوفك وسط مشراق
وترجع لي البسمه وطيب الحكاوي
لولا الحياء لا أحطك بالاحداق
واغمض أجفاني واعلنها شقاوي
وربعي هواهم داخل النفس منساق
سوقة غرام الخل في نفس الهواوي
رفعت بيرق وصلهم بالسما خفّاق
وبنيت جسرٍ ما تهده هقاوي
يا الله عسانا على الود عشّاق
نمد حبلٍ ما تهزه بلاوي
ويا الله وسّع لنا باب الأرزاق
وجنّب عبيدك عن دروب المهاوي
