المهم خلصت ولكن ماتخطيتة
وماادري اليفارك هيج تاليتة
وانة استغرب اليسألني شو تعبان
جا هوه اليحب حسبالكم هيتة
اعلة گد نيتي هويتة وكلت بلكت خير
بس هوه چذب موش أعلة كد نيتة
مدري انه وفي مدري انة خوش انسان
مدري انتة شخص موزينة تربيتة
البعد بيناتنة بعد السمة اعله الكاع
هوه مشيطن وانه اعله الاهيتة
هسة انه عرفتة انسان مابي خير
هاي الذاكرة المن مخليتة
وانا ماعايز من الضيم عندي اشكال
وفوك الضيم من حبيتة حبيتة
من يمي گضت يم الله بيهه هواي
ويردلك اضعاف البية سويتة
باجر تنسأل ع الحبك وداراك
بيمن قصر وهيج استغليتة
وانتة العايفة من اهل الگلوب البيض
اذا تحتاج بيتة يشيل من بيتة
وانة الهامني فد يوم اذا مشتاگ
هذا اليوم گلي شلون عديتة
هم تحتاجني تبجيلي لو تنهار
لو هيه بعد كلمن وحنيتة
جنت اتمنة تطلع نفس ماظن بيك
بس المثلك أصلن ماتمنيتة
واحد لاضمير ونرجسي وچذاب
ومايهتم شمنطي المهم شنطيتة
صرت لاتستحي ولا لك خلك وياي
وگول يجوز هم تعبانه نفسيتة
بس هيه بعد بينت لمن گام
يتنرفز أذا احجي بخصوصيتة
ولحد بيكم يگلي انته شموازيك
لو ماداگ ناعم ماتعنيتة
هوه الجابني الهذا الدرب والنوب
مااعجب صرت وبسجن خليتة
لو ارضالة يغلط لو يلف ويدور
لو اطلع معقد عكس عقليتة
شخصيتة قويه ومايهزة الشوگ
چا تقوه على القوالة شخصيتة
انة بعيني اگبر چي وفيت وياك
وانتة تضل رخيص وانة غليتة
