السلام عليكم و رحمة الله و بركاته 🌷
مرة على مرة نحب نشارك معاكم خواطري الدفينة😂
المهم كيما علابالكم يعني أنا في نوفمبر الماضي تقريبا بديت mon residanat في قسم طب الاعصاب بمستشفى باب الواد.
عموما اول انطباع ليا كان مليح بزاف _ دخلت بنيتي يعني _
قلت service ماشاء الله من لبروف و assistant و résidents
المهم :)
مامرتش اسابيع قليلة درت اول garde ليا مع assistante أقل مايقال عنها انها خبيثة، فيها شر مازلت اليوم مانقدرش نستوعبو !
في الأول هاذ assistante كانت تبينلي واحد la gentillesse مش طبيعية، وين تلقاني ارواحي نفهمك، ارواحي نشرحلك، وشراكي داود ،، المهم ملايكة :) ،
المهم قدرلي ربي درت معاها اول ڨارد ء وانا بعد الاهتمام العجيب منها قلت محال تكون فيها قطرة شر :)
كنا قاعدين فلاغارد نحكيو على neuro يعني ، وقالتلي مع الوقت دك تتعلمو توليو تقراو les publications و les nouvelles recommandations, قتلها انا بنيتي يعني أنا مهتمة بزاف بهذا المجال يعني research وكذا ومالفة نقرا يعني و نشرت ديجا publications ، المهم اذا بوجهها ينقلب 180 درجة ولات تشبه لهذيك الساحرة الشريرة تاع سبيستون 🙃
وقالتلي نتي سوطيتي لحاجة بعيدة بزاف عليك و بدات تسقسيني في امور حتى ساقتني نحكي شوية امور شخصية يعني ،،، المهم قالتلي بالاكي لبروف يسمع،و ماتحكي لحتى واحد :)
قلت اوك مش نحكي:0
المهم
أيام بعدها بداو جماعة يمعنولي بالهدرة
و حتى نلقا maître assistante تقلي حوسيلي لكتاب لفلاني بالإنجليزية
أنا بقيت حايرة وش كاين
حتى واحد النهار حكمتتي résidente majeure قاتلي داود عجبك السارفيس , قتلها بحماقة ايه :) ، قاتلي وش عجبك فيه ، قتلها كلش ب les résidentes ب les assistants
شافت فيا تاع يابنتي فيقي لعمرك ، وقالتلي سمعتي وش قال لبروف عليك :) و بلي فلانة اللي قالتلك ماتقوليلوش هاي وش قالت عليك
طبعا انا تشوكيت لانو العفسة اللي وصلتها لبروف ، كن جا لبروف مايخافش ربي كان شراهالي لانو كامل علابالهم بلي مايشتيش هذيك العفسة
المهم تمر الايام ، و رحت للبروف قتلو كذا كذا وحكيتلو أمور حبيت نخبرو بيها احتراما له يعني .
المهم للبروف بعدها رح يحكي معاهم ويقلهم قاتلي داود كذا وكذا و عرفو كامل، ف assistante الحية كي راح قاتلهم انا كنت حابة نوصلها للبروف و هاني وصلتهالو قبل ما تقولو يا حسراه :)
المهم حبيت نحكيلكم برك هاذ التجربة باه اللي مقبلين على امتحان الريزيدانا يردو بالهم مستقبلا إن شاء الله ، ماينخدعوش بابتسامة التماسيح و الحيات:) ، ماتحكوش تفاصيل حياتكم ولا مخططاتكم و لا انجزاتكم ، في الأول خليكم حذرين و المواقف هي اللي رح تكشفلكم معادن الناس .
دمتم بخير 🌷:)
