«Илмиге эм халкка кызмет кылув»
Х.Б.Байрамукова атлы Оькиметлик миллет библиотекасынынъ йыйылыслар залында белгили ямагатшылык-политикалык аьрекетшиси, тарих илмилерининъ кандидаты, интернационалшы, зегенли уйгынлавшы, йырма йылдынъ бойында (1963-1982й.й.) «Сый Белгиси» орденли Карашай-Шеркеш илми-тергев институтын (аьлиги заманда Карашай-Шеркеш гуманитарлык тергевлер институты) басшылаган Роза-Абдул-Хамидовна Джанибековадынъ тувганлы 100 йыллыгына «Илмиге эм халкка кызмет кылув» деп аталган эскеруьв амалламасы озды.
Амалламада республикадынъ власть органларынынъ эм ямагатшылык организацияларынынъ элшилери, Карашай-Шеркеш илми-тергев институтынынъ, республикалык СМИ-нинъ, библиотекадынъ куллыкшылары, Роза Абдул-Хамидовнадынъ тувганлары, студентлер канастылар.
Р.А.-Х.Джанибекова аты тек ногайлар арасында тувыл, Карашай-Шеркеш Республикасында эм онынъ тысында кенъ белгили болган. Онынъ етекшилиги мен оьзлериннен сонъ Карашай-Шеркеш халкларынынъ фольклор, тил, адабият, этнография, тарих, экономика, философия маьселелери бойынша оьзлериннен сонъ коьплеген фундаментальли куллыкларды калдырган бир неше аркадынъ коьплеген коьримли аьлимлери оьскенлер.
Институтка куллыкшыларды алувда Роза Абдул-Хамидовна олардынъ тек кеспилик эм аьдемшилик сапатлары ман, миллетине коьре баскаландырмай, басшыланган. Туьрли йылларда онынъ шакырувы ман институттынъ штатына А.И.-М.Сикалиев, Р.Х.Керейтов, М.А.Булгарова. А.Х.Карданова, А.Х.Ерижева, Р.С.Тебуев эм коьплеген баска, сонъалыкта Карашай-Шеркеш Республикасынынъ илмисине маьнели косымларын эткен, коьримли аьлимлер болган, специалистлер алынганлар.
Библиотекадынъ холлында КЧИГИ-динъ илми баспалавларыннан выставка аьзирленген эди. Сондай болып институттынъ куллыкшылары ман Роза Абдул-Хамидовнадынъ тувганлы 100 йыллыгына онынъ яшавына эм илмилик аьрекетине багысланган «Золотой век КЧНИИ» деп аталган библиографиялык билдируьвши баспаланган эм амалламадынъ катнасувшыларынынъ алдына шыгарылган эди. Билдируьвши ис досларынынъ эскеруьвлери мен, дурбатлар ман, куллыкларынынъ библиографиялары ман толыстырылган.
Роза Абдул-Хамидовна Джанибековадынъ ярык эстелиги дайым яшаяк.
Эскеруьв амалламасы айлак йылы авада озды. Сонъ онынъ катнасувшылары эстеликке каьртке туьстилер.
