ንቁ ትውልድ-Niku Twld (@nikutwld) — Telegram — TG.ME

ንቁ ትውልድ-Niku Twld (@nikutwld) — Telegram — TG.ME

ጊዜው የይሁዳ ንጉሥ ሕዝቅያስ በኢየሩሳሌም የነገሠበት ወቅት ነበር። ያኔ ምድርን በኃያልነቱና በጭካኔው ያንቀጠቀጠው የፋርስና የአሦር ንጉሥ ሰናክሬም፣ እጅግ ግዙፍና አስፈሪ ሠራዊቱን አስከትሎ ወደ ኢየሩሳሌም መጣ። ቅጽሯን አጥብቆ ከበባት፤ ህዝቡንም በታላቅ ፍርሃት አወከው።

ሰናክሬም በጉልበቱና በሠራዊቱ ብዛት በመታበይ፣ ከንቱ በሆነ ትዕቢት ተሞላ። የሰማይና የምድር ፈጣሪ የሆነውን እግዚአብሔርን በመሳደብና በማንኳሰስ ወደ ንጉሡ ወደ ሕዝቅያስና ወደ ይሁዳ ሕዝብ እንዲህ የሚል መልእክት ላከ፦

"በእውኑ ከእጄ ሊያድናችሁ የሚችል አምላክ አለን? አትታለሉ!"

ንጉሡ ሕዝቅያስ ይህንን ዛቻና በፈጣሪው ላይ የተሰነዘረውን የስድብ ቃል በሰማ ጊዜ ልቡ በሐዘን ተሰበረ። ነገር ግን እንደ ሰናክሬም በጦርና በጋሻ ሳይሆን፣ እውነተኛው መሸሸጊያ በሆነው በፈጣሪው ተማመነ። ንጉሣዊ ልብሱን አውልቆ፣ የትሕትናና የንስሐ ምልክት የሆነውን ማቅ ለበሰ። ቀጥታም ወደ እግዚአብሔር ቤት (ቤተ መቅደስ) በመግባት በግምባሩ ተደፍቶ ሰገደ።

ሕዝቅያስ በዕንባና በታላቅ ልመና ወደ ሰማይ ጮኸ፦ "አምላክ ሆይ! አገራችንንና ቅድስት ከተማችንን ኢየሩሳሌምን ከዚህ ጨካኝ ጠላት እጅ አድን!" እያለ ማለደ።

እግዚአብሔር የሕዝቅያስን ትሕትና፣ የሕዝቡን ጭንቀትና እውነተኛ ጸሎት ሰማ። በዚያች በታላቅ የጭንቀት ሌሊት፣ ፈጣሪ የሰማይ ሠራዊት አለቃ የሆነውን፣ ታላቁን መልአክ ቅዱስ ሚካኤልን ወደ ሰናክሬም ሰፈር ሰደደው።

የብርሃን መልአክ ቅዱስ ሚካኤል እጅግ አስደናቂና አስፈሪ በሆነ መለኮታዊ ኃይል ወደ ሰናክሬም ሠራዊት መሃል ወረደ። በዚያች በአንድ ሌሊት ታላቅ ተአምር ተደረገ፤ የመልአኩ ሰይፍ በጠላት ሰፈር ላይ በተቃጣ ጊዜ፣ ከሰናክሬም ሠራዊት መካከል አሥራ ስምንት ዕልፍ ከአምስት ሺህ (185,000) የሚሆኑት ኃያላን ወታደሮች ሙሉ በሙሉ ወደቁ።

ታላቁ የይሁዳ ሕዝብና ቅድስት ከተማ ኢየሩሳሌም፣ አንድም ሰው ሳይሞትባቸውና ሳይደማባቸው፣ በሚያስደንቅ መለኮታዊ ጥበቃ ከጥፋት ዳኑ። ትዕቢተኛው ንጉሥ ሰናክሬምም በኃፍረትና በውርደት ተመትቶ ሸሸ።

የቅዱስ ሚካኤል ጥበቃ፣ ፈጣን አማላጅነትና ተራዳኢነት ከሁላችን ጋር ይሁን። አሜን🙏

ዛሬ ሰኔ 30 በእግዚአብሔር ፊት ታላቅ የሆነው፣ በፅንስ ሳለ ለጌታው የሰገደው፣ የነቢያት መደምደሚያና የሐዋርያት መጀመሪያ የሆነው የመጥምቀ መለኮት የቅዱስ ዮሐንስ የልደት በዓል ነው።እንኳን አደረሳችሁ እንኳን አደረሰን🙏

«በእውነት እላችኋለሁ፥ ከሴቶች ከተወለዱት መካከል ከመጥምቁ ዮሐንስ የሚበልጥ አልተነሣም…» (ማቴ 11፥11)

ታሪኩ የሚጀምረው በይሁዳ ተራራማ ሀገር ነው። ካህኑ ዘካርያስና ሚስቱ ኤልሳቤጥ በሰው ዓይን መካን፣ በዕድሜም የሸመገሉ ነበሩ። ልጅ የመውለድ ተስፋቸው በምድራዊ ስሌት አብቅቶ ነበር። ነገር ግን እግዚአብሔር የዘካርያስን ጸሎት ሰማ። ታላቁ መልአክ ቅዱስ ገብርኤል በቤተ መቅደስ ተገልጦ የምስራቹን አበሰረው፦ «ሚስትህ ኤልሳቤጥ ወንድ ልጅ ትወልድልሃለች፥ ስሙንም ዮሐንስ ትለዋለህ። ደስታና ተደላም ይሆንልሃል በመወለዱም ብዙዎች ደስ ይላቸዋል።» ሉቃ 1:13-14 ዘካርያስ ነገሩን ማመን ስላቃተው ምልክት እንዲሆነው እስከሚወለድ ድረስ ዲዳ ሆነ።

እመቤታችን ቅድስት ድንግል ማርያም የኤልሳቤጥን መፅነስ በሰማች ጊዜ ልትጠይቃት መጣች። ድንግል ማርያም ሰላምታዋን ስታቀርብ፣ በኤልሳቤጥ ማህፀን የነበረው የስድስት ወር ፅንስ (ዮሐንስ) በደስታ ዘለለ! ገና ሳይወለድ በቅዱስ መንፈስ ተሞልቶ በማህፀን ሳለ ለጌታው ሰገደ። ዛሬ ሰኔ 30 ቀን ህጻኑ ተወለደ።

በስምንተኛውም ቀን ስሙ ማን ይባል። ሲሉ ዘካርያስ በሰሌዳ ላይ «ስሙ ዮሐንስ ነው» ብሎ ጻፈ ትርጉሙም ፍስሃ ወሀሴት ማለት ነው። በዚያው ቅጽበት አንደበቱ ተፈትቶ እግዚአብሔርን ማመስገን ጀመረ።

ይህ ህጻን ግን እንደማንኛውም ልጅ በምቾት አላደገም። ገና በሕፃንነቱ የአባቱን መገደል ተከትሎ፣ እናቱ ኤልሳቤጥ ይዛው ወደ ምድረ በዳ ሸሸች። እናቱ ስታርፍም ዮሐንስ በዚያች አስፈሪ ምድረ በዳ ብቻውን በእግዚአብሔር ጥበቃ አደገ።ልብሱ የግመል ጠጉር፣ በወገቡም ጠፍር ታጥቆ ነበር። ምግቡ አንበጣና የበረሃ ማር ነበር። የሰው ፊት ሳያይ፣ በጾምና በጸሎት፣ ከኃጢአት በራቀ ቅድስና እስከ 30 ዓመቱ በበረሃ ኖረ።

ጊዜው ሲደርስ የእግዚአብሔር ቃል ወደ ዮሐንስ መጣ። ከበረሃ ወጥቶ በዮርዳኖስ ዙሪያ «መንግስተ ሰማያት ቀርባለችና ንስሐ ግቡ!» እያለ ማስተማር ጀመረ። እርሱ ለብርሃኑ ሊመሰክር የመጣ የብርሃን መብራት፣ የጌታን መንገድ የሚጠርግ «በምድረ በዳ የሚጮህ ሰው ድምፅ» ነበር።

ታሪኩ ከፍታ ላይ የደረሰው የዓለምን ኃጢአት የሚያስወግደውን የእግዚአብሔርን በግ — ኢየሱስ ክርስቶስን በዮርዳኖስ ወንዝ ሲያጠምቅ ነው። ፈጣሪ በፈቃዱ በፍጡሩ እጅ ተጠመቀ፤ ዮሐንስም የመለኮትን ራስ በመንካቱ «መጥምቀ መለኮት» ተባለ።

ቅዱስ ዮሐንስ እውነትን ለንጉሥም ቢሆን ከመናገር ወደኋላ አላለም። የገሊላው ገዥ ሄሮድስ የወንድሙን ሚስት ሄሮድያዳን በግፍ አግብቶ በነበረ ጊዜ፣ ዮሐንስ ፊት ለፊት ተቃወመው፦ «የወንድምህ ሚስት ለአንተ ልትሆን አልተፈቀደም!» አለው።
በዚህ ምክንያት ወህኒ ወረደ። በመጨረሻም በሄሮድያዳ ተንኮልና በሄሮድስ የትዕቢት መሐላ ምክንያት፣ በዚያው በወህኒ ቤት ሳለ ራሱ በሰይፍ ተቆረጠች። ቅዱስ ዮሐንስ ስለ እውነትና ስለ ጽድቅ ህይወቱን የሰጠ ታላቅ ሰማዕት ሆነ።

የታላቁ ነብይ የመጥምቀ መለኮት የቅድስ ዮሐንስ በረከት፣ምልጃና ጥበቃ ከሁላችን ጋር ይሁን አሜን🙏