នាល្ងាចថ្ងៃទី១ ខែកញ្ញា ឆ្នាំ២០២៦ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានដឹកនាំគណៈប្រតិភូកម្ពុជាទៅកាន់រដ្ឋធានីឌីលី ប្រទេសទីម័រឡេស្តេ ដើម្បីចូលរួមកិច្ចប្រជុំថ្នាក់រដ្ឋមន្ត្រីនៃក្រុមប្រទេសអភិវឌ្ឍន៍តិចតួច (LDC)។
វេទិកានេះគឺជាសមរភូមិការទូតដ៏សំខាន់ ដែលកម្ពុជា និងប្រទេសចំនួន៤៣ផ្សេងទៀត នឹងរួមគ្នាទាមទារឱ្យមានការផ្តល់ «ហិរញ្ញប្បទានអាកាសធាតុ» ឱ្យបានទូលំទូលាយ និងងាយស្រួលជាងមុន ដើម្បីជួយសង្គ្រោះប្រទេសដែលងាយរងគ្រោះពីការខូចខាតដោយសារបម្រែបម្រួលអាកាសធាតុ។
ក្នុងឱកាសនេះ កម្ពុជានឹងបង្ហាញពីការប្តេជ្ញាចិត្តយ៉ាងមុតមាំរបស់ខ្លួនក្នុងការកាត់បន្ថយការភាយឧស្ម័នផ្ទះកញ្ចក់រហូតដល់ ៥៥% ត្រឹមឆ្នាំ២០៣៥ និងជំរុញសហគមន៍អន្តរជាតិឱ្យរក្សាកម្ដៅផែនដីកុំឱ្យកើនហួស ១,៥ អង្សាសេ។ រាល់លទ្ធផលនៃការទាមទារនេះ នឹងត្រូវនាំយកទៅកាន់កិច្ចប្រជុំកំពូល COP31 នៅប្រទេសទួរគីយ៉េ នាចុងឆ្នាំនេះ ដើម្បីតម្រូវឱ្យប្រទេសមហាអំណាចគោរពការសន្យារបស់ខ្លួន។
