الكورتيزول وعلاقته بهرمون الذكورة (التيستوستيرون)..
🔻اول حاجة ايه هو الكورتيزول ؟
الكورتيزول ده هرمون بيتفرز في الجسم كإستجابة للتوتر والضغط العصبي.. مهمته الأساسية إنه يخلي جسمك يعرف يتعامل مع المواقف الصعبة..
🔻طب بيعمل ده ازاي؟
*يرفعلك مستوى سكر الدم عشان يدي طاقة لجسمك بشكل سريع
* يحفز تفكيك البروتين اللي في عضلاتك عشان يطلع منه طاقة يديهالك
* يوقفلك بعض من وظايف جسمك بشكل مؤقت زي الهضم والمناعة والرغبة الجنسية
وكل الكلام ده مفيش فيه مشكلة على المدى القصير لحد ما تعدي من الموقف اللي وترك أو الضغط العصبي اللي اتحطيت فيه
المشكلة لو جسمك على طول داخل في الحالة دي
وهنقول قدام اثر ده على جسمك..
🔻 طيب ايه الحاجات اللي بترفع الكورتيزول عشان تتجنبها؟
* التوتر يعتبر أهم مؤثر بيرفع الكورتيزول سواء انت متوتر من مشكلة او من ضغط في الشغل او من دراسة.. الخ او إنك طول اليوم داخل في حالة غضب عشان مش عارف تتحكم في ضغوطاتك اليومية وبتفكر في المستقبل كتير
* قلة النوم..
النوم المتقطع او اللي اقل من ٦-٨ ساعات أو السهر أو البحلقة في التلفون لفترة طويلة قبل النوم
كل دول بيخلوا الجسم يفرز كورتيزول كمان وكمان عشان يعرف يتعامل مع الضغط اللي انت حاطه فيه لأن جسمك متسستم إن ده وقت راحته وخلاص المفروض يقلل من نشاطه
* الكافيين الزيادة عن الحاجة..
اخرك لحد العصر مع الشاي والقهوة او مشروبات الطاقة او حتى المشروبات الغازية اللي بردو فيها كافيين زي البيبسي وغيره
* الإفراط في الرياضة
زي ما الرياضة ليها اثر ايجابي على صحتك النفسية والجسدية بردو الإفراط فيها زيادة عن المعقول بيدخل جسمك في حالة اجهاد فيفرز كورتيزول اكتر
راعي إن جسمك ياخد كفايته من الراحة والتعافي بعد التمرين
🔻 نيجي لأهم جزئية.. ازاي بيأثر الكورتيزول على هرمون الذكورة (التيستوستيرون)
احفظها كقاعدة إن الهرمونين دول دايماً عكس بعض..
يعني كل ما عِلي عندك الكورتيزول كل ما انخفض التيستوستيرون والعكس بالعكس
* طيب ده بيحصل ازاي؟
🔻الكورتيزول لما بيعلى بيقلل من حساسية الخصيتين للهرمونات اللي بتحفز انتاج هرمون الذكورة
🔻 بيزود من عملية إسمها(Aromatization) ودي عملية بيتحول فيها التيستوستيرون لهرمون الإنوثة (الإستروجين)
وكلفتة سريعة هنا اهتم إنك تاكل خضروات صليبية قد ما تقدر هيقللوك من حدوث العملية دي..
خضروات صليبية زي البروكلي.. القرنبيط.. الكرنب
او إنك تجيب مكمل إسمه DIM غالي شوية ولازم تاخده بمتابعة مع طبيب
🔻بردو الكورتيزول لما بيعلى بيزود من تخزين نوع من الدهون اسمه الدهون الحشوية ودي بتتخزن حول الأعضاء الداخلية زي الكبد والأمعاء
والنوع ده من الدهون مليان بإنزيم الأروماتاز اللي بيعمل عملية (Aromatization ) اللي اتكلمنا عنها من شوية
مش محتاج انبهك إن بردو خطوة مهمة إنك تقلل من وزنك الزايد
🔻 وفي الاخر كملخص سريع بلاش سهر.. بلاش بحلقة في التليفون بعد الساعة ٨ بالليل وإذا كان ولا بد وعندك شغل عليه.. فيه تليفونات فيها خاصية إنها توقف الضوء الازرق اللي طالع من الشاشة واللي هو سبب في تثبيط افراز الميلاتونين اللي بيخلي جسمك يتهيأ للنوم في الليل.. .. بلاش كافيين بعد العصر أو على الأقل قبل النوم بست ساعات.. اهتم إنك تاكل خضار كل يوم وخليك كريم في الكمية
بلاش تضغط نفسك.. اسرع طريق تقتل بيه توترك هو إنك تبدء بأي حاجة وراك انت مأجلها ولو حتى تضحك على دماغك بإنك داخل تشتغل او تذاكر لخمس دقايق بس وهتقوم.. غالباً العزم اللي هيتولد من البداية البسيطة دي مش هيخليك توقف لحد ما تكمل
ودايماً افتكر إن متعة العمل او المذاكرة مبتجيش إلا بعد ما تخلص بس احنا المفهوم ده عندنا اتعكس عشان اتعودنا على المتعة اللحظية اللي بتحققهالك مواقع التواصل او الألعاب او الريلز القصيرة.. الخ
فكان انعكاس المفهوم ده سبب إنك تتكاسل عن اللي وراك عشان دماغك عاوزة الدوبامين السهل السريع ومش هتفضله عن التاني اللي يتولد من الانجاز إلا بعد ما تجربه مرة واتنين
11
2February 25, 2025 659 12
