Buxoroda otinoyilar uchun o‘quv seminari o‘tkazildi
Joriy yilning 3–4-sentyabr kunlari Buxoro shahrida "Mafkuraviy xatarlarga qarshi kurashda otinoyilarning o‘rni hamda mas’uliyati" mavzusiga bag‘ishlangan ikki kunlik o‘quv seminar-trening bo‘lib o‘tdi.
Din ishlari bo‘yicha qo‘mita, viloyat hokimligi, Imom Moturidiy xalqaro ilmiy-tadqiqot markazi hamda O‘zbekiston musulmonlari idorasi viloyat vakilligi hamkorligida o‘tkazilgan ushbu tadbirda sohaning tajribali mutaxassislari ma’ruza bilan chiqish qildilar.
O‘quv mashg‘ulotlari davomida Imom Moturidiy xalqaro ilmiy-tadqiqot markazi ilmiy xodimlari tomonidan "Moturidiylik ta’limotining mutaassib toifalarga qarshi kurashdagi o‘rni" hamda "Soxta salafiylarning aqidaviy xatolari" mavzularida ma’ruzalar qilindi.
Ochiq va samimiy ruhda o‘tgan savol-javob mashg‘ulotlarida ishtirokchilarga xotin-qizlar o‘rtasida sog‘lom ma’naviy muhitni shakllantirish, mafkuraviy tahdidlarga qarshi ma’rifat bilan kurashish yuzasidan zarur manbalar va amaliy tavsiyalar taqdim etildi.
Bu kabi tadbirlar jamiyatda ma’naviy barqarorlikni ta’minlash, xotin-qizlarning jamoat ishlaridagi faolligini oshirish va milliy qadriyatlarimizni avloddan avlodga avaylab yetkazishda muhim ahamiyat kasb etadi.
@muminauz 
muminauzportali
