خولی ژمارە ٩ی پەرەپێدانی کۆمپیوتەر بەردەوامە،
ئەمڕۆ وانەیەکی هۆشیاری پێشکەش کرا
راگەیاندنی وەزارەتی پێشمەرگە
ئەمڕۆ ٣٠ی ئابی ٢٠٢٦، لە میانەی بەڕێوەچوونی خولێکی پەرەپێدانی کۆمپیوتەر لە بەڕێوەبەرایەتی تەکنەلۆژیا و زانیاری، لیوا عوسمان مەحەمەد مستەفا، بەڕێوەبەری گشتی ڕاگەیاندن و هۆشیاریی نیشتمانی لە وەزارەتی پێشمەرگە، وانەیەکی هۆشیاریی بۆ بەشداربووانی خولی ژمارە (٩)ی پەرەپێدانی کۆمپیوتەر پێشکەش کرد، کە بە سەرپەڕشتی بەڕێوەبەرایەتی تەکنەلۆژیا و زانیاری بۆ بە بەرزکردنەوەی ئاستی زانستی و توانای کارگێڕیی کارمەندانی یەکە و بەشە جیاوازەکانی وەزارەتی پێشمەرگە ڕێکخرابوو.
لە وانەکەدا، بەڕێوەبەری گشتی ڕاگەیاندن و هۆشیاری نیشتیمانی، تیشکی خستە سەر چەند تەوەرێکی گرنگ و هەنووکەیی، لە پێشەنگیان، ئاسایشی ئەلیکترۆنی و گرنگی پاراستنی زانیارییەکان لە مەترسیە دیجیتاڵیەکان بە ئامانجی پاراستنی داتا سەربازی و کارگێڕییەکان، هەروەها جەختی لەسەر پابەندبوونی ئەخلاقی و پیشەیی ئەفسەران و کارمەندان بە بڕیار و ڕێنمایە فەرمیەکانی وەزارەتی پێشمەرگە کردەوە، وەک بنەمایەکی سەرەکی بۆ پاراستنی نهێنیە کەسی و دامەزراوەییەکان.
لە تەوەرێکی دیکەدا، لیوا عوسمان مەحەمەد جەختی لە گرنگی بەردەوامی خولەکانی فێرکاری لە بوارەکانی تەکنەلۆژیا و میدیا کردەوە، ڕوونیکردەوە کە پاراستنی زانیاری و نهێنیەکان ئەرکی سەربازییانەی پێشمەرگەیە و بەشێکی دانەبڕاوە لە پاراستنی ئاسایشی خۆی و دامەزراوەی سەربازی وەزارەتی پێشمەرگە، ئاماژەی بەوەش دا کە وەزارەت هەوڵی بەردەوام دەدات بۆ بەهێزکردنی توانا مرۆییەکان و بەرزکردنەوەی ئاستی هۆشیاریی ئەمنی لەناو ڕیزەکانی پێشمەرگەدا، تاوەکو ڕێگە لە هەر کەمتەرخەمی و هەڵەیەک بگیڕێت کە دوژمن یان کەسانی دژبەر بتوانن بۆ مەرامی خۆیان بیقۆزنەوە. لە کۆتایشدا ئاماژەی بەوە دا کە هەوڵەکان بەردەوامن، بۆ بەهێزکردنی توانا هەمەجۆرەکانی هێزی پێشمەرگە لە بوارە جیاوازەکاندا، تاوەکو بتوانن هاوشانی پێشکەوتنە سەردەمیەکان و تەکنەلۆژیا هەنگاو بنێن.
