Тевфтома аф лядонды
Атюрьевскяй райононь Каргоньжяй велеса лац содаф М.С.Маркинать лемоц. Тя трудонь кельги мокшавась сембе эсь эряфонц максозе «Сосновский» совхозти, потьнесь тракст. Тумок пенсияс, тевфтома ашезь ляда. Сонцень оцю хозяйствац. Тяда башка оцю лезкс максси тястонь церькавти. Кизотне ётайхть, сирешись чакай кенкшти. Шабрань велетнень эса церькафне цебярьхть, аньцек кода тоза пачкотькшнемс. А эсь церькавсот, кода корхтай Мария Степановна: «Ков аф арат, тоса комиссарат». И видец мокшавать. Эрь службати велень храмть лия аватнень мархта штасазь-урядасазь. Мезе эряви службанди, рамасазь, кандсазь кудста. Кой-коста кочксихть ярмаконя и велеряйхнень кядьста. Семботь тиендьсазь сянкса, штоба церькавсь панчсеволь, вятевольхть эсонза службатне. Храмонь настоятельсь, священниксь Николай (Н.Г.Большаков) аф мушенды валхт лездыенц, Мария Степановнань, шнамс. Сонцьке мокшавась шумос аф ляды.
—Батюшканьке цебярь,—корхтай сон.—Фкя кяль мархтонза мушенттама фалу. Тевда храмсонк лама, сатыхть сембонди. А кда аф карматама лездома, храмсь велеса куватьс аф кирди.
И тя виде. Кда аф Мария Степановна, велень лия аватне, пади, храмське пякстаф улель.
Шачсь и кассь Мария Степановна мокшень сире велеса Пакся Кярьгоняса Макаркиттнень трудонь кельги семьясост. Аляц, Степан Макаркин, сембе эсь эряфонц максозе совхозти, коса покодсь полеводкс, сторожкс, усксесь кши велень лавкатненди, тиендсь лия тефт. Тядяц, Татьяна Васильевна, тяфта жа покодсь совхозса, шачфтсь и касфтсь вете итть. Сембе синь арасть цебярь ломанькс. Вететнень эзда аньцек кафттне лядсть вели эряма. Антонина Степановна эряй шабрань Сире Кушка велеса, тяни тожа пенсионерка. Сазоронц аф юкснесы, инжикс сашенды сидеста.
Мария Степановна васенда тонафнесь Пакся Кярьгонянь школаса. Тоса ётась тонафнема Каргоньжяи. Получамок средняй образования, арьсесь лядомс вели. Шабакс якась и табаконь видема, и путфкснень мельге ванома. Усксесть жувататненди сенаж. А школать аделамда меле трудендакшнесь Оцядувонь участковай больницяса прачкаса. Муськондсь сярядихнень мельге больницянь паршить эса. Тевсь аф тёждятнень эздоль, но кинди-бди сон эрявсь тиемс.
Пинге ётазь васьфтезе эсь мирденц, Каргоньжяень цёрать И.И.Маркинонь. Иван Иванович пингть тарксема ашезь карма. Эстокиге кучсь кудат. И вов ни 47 киза марсот. Мария Степановна 35 кизода лама потьнесь «Сосновский» совхозса тракст. Фалу ульсь передовой дояркакс. Кодама аньцек казненза аш. Тянемс аньцек шнамань валса лятфнесы хозяйствань вятить Е.Т.Ермолаевонь. Сон лама тись совхозть кеподемаса, пичедсь ломаттнень инкса. Тяни Егор Тимофеевич кулоф. Лемонц каннесы Каргоньжяень од ульцясь. Ломаттневок корхнихть колганза аньцек шнамань валса. Иван Иванович тяка жа совхозса покодсь трактористокс. Тялонда трудендакшнесь фермаса
—Улель аньцек шумбраши, и кудонь тефнень тисаськ, и церькавтивок лезттама,—корхтай Мария Степановна.
Илья Вешкин.
