အပြုံးလေး Translation Channel

မင်မင် ကိုယ်တိုင် အယူဆလွဲမှားပြီး အလွယ်သုံးခဲ့မိတဲ့ စကားလုံးပါ။

မြင်းနက် နဲ့ ဖျက်မြင်း

“ မြင်းနက် “ ဆိုသည့် စကားလုံး မူလအစက ..

မြင်းပြိုင်ပွဲတွေမှာ လူကြိုက်နည်း၊ လောင်းကြေးနည်းပြီး နိုင်လိမ့်မယ်လို့၊ ဘယ်သူမှ ထင်မထားသည့် မြင်းတစ်ကောင် .. အရှိန်တင်ပြီး ပထမရသွားတာကို ခေါ်ဆိုရာကနေ ဆင်းသက်လာတာပါရှင့်။

ရှန်းရှလောကထဲ “ မြင်းနက် “ ကို ဘယ်နေရာတွေ သုံးလဲဆိုရင် …

၁။ ဂိုဏ်းတူပြိုင်ပွဲ နဲ့ စွမ်းရည်စမ်းသပ်ပွဲတွေမှာ အသုံးများပါတယ်။

ဘယ်သူမှ အသိအမှတ်မပြုထားတဲ့၊ နောက်ခံအင်အားမရှိသော ကျင့်ကြံသူတစ်ယောက် ..

ဒီလိုလူက အင်အားစုကြီးတွေရဲ့ ပါရမီရှင်တွေကို အပြတ်အသတ် အနိုင်ယူပြလိုက်တဲ့အခါ .. “သူကတော့ ဒီပွဲရဲ့ မြင်းနက်ပဲ” လို့ တင်စားတတ်ကြပါတယ်။

၂။ ရှန်းရှလောကရဲ့ သဘောသဘာဝအရ အားနည်းသူကနေ အားကောင်းသူ ဖြစ်လာဖို့ဆိုတာ အရမ်းခက်ခဲပါတယ်။

ဒါပေမဲ့ ဇာတ်လိုက်တစ်ယောက် ကြီးမားတဲ့ ကံကောင်းမှု ရရှိသွားပြီး ..

ဥပမာ— ရှေးဟောင်းအမွေအနှစ်ကို ဆက်ခံရရှိတာ၊ ထူးခြားတဲ့ ဆေးလုံးတွေကို စားမိတာ သို့မဟုတ် ထူးခြားတဲ့ သွေးမျိုးဆက် နိုးထလာပြီး စွမ်းရည်တွေ ရုတ်တရက် ခုန်တက်သွားတဲ့ အခါမျိုးတွေမှာလည်း ..

စာဖတ်သူတွေက မူရင်းစာရေးဆရာပိုစ့်အောက်မှာ စာစဉ်ထဲ “ မြင်းနက် “ တစ်ကောင်ပေါ်လာပြီလို့ သုံးနှုန်းတတ်ကြပါတယ်။

၃။ ဒီ “ မြင်းနက် “ အား တစ်ခါတရံ ဝတ္ထုတွေကို ညွှန်းဆိုတဲ့နေရာမှာလည်း စာဖတ်သူတွေ သုံးကြပါတယ်ရှင့်။

ဥပမာ - လူသိနည်းတဲ့ စာရေးဆရာတစ်ယောက်ရဲ့ ရှန်းရှစာစဉ်က ပရိသတ်အကြိုက်နဲ့ ကွက်တိကျပြီး ဖတ်ရှုသူနှုန်း (Views) ဝုန်းခနဲ တက်လာရင်၊ Top 10 ထဲ ဝင်သွားရင် .. “ဒီစာစဉ်ကတော့ ဒီနှစ်ရဲ့ မြင်းနက်ဝတ္ထုပဲ” လို့ ပြောလေ့ရှိကြပါတယ်။

အနှစ်ချုပ်အားဖြင့်ဆိုရရင် -

ရှန်းရှစာစဉ်တွေထဲက “မြင်းနက်” ဆိုတာ အထင်သေးခံရမှုတွေကနေ ရုန်းထွက်သူ၊ လူတိုင်းကို ပါးစပ်အဟောင်းသား ဖြစ်သွားအောင် သက်သေပြနိုင်ခဲ့တဲ့သူ ..

… စတဲ့

“မျှော်လင့်မထားသော လူစွမ်းကောင်း/ပါရမီရှင်” တွေကို ရည်ညွှန်းတဲ့ အသုံးအနှုန်း ဖြစ်ပါတယ်ရှင့်။


ဖျက်မြင်း

ဖျက်မြင်း အဓိပ္ပာယ်က … မိမိကိုယ်တိုင် နိုင်ဖို့ထက် သူတစ်ပါး နိုင်မယ့်ပွဲကို ပျက်စီးအောင်၊ အနှောင့်အယှက်ဖြစ်အောင် လုပ်ဆောင်တဲ့သူ။ မြန်မာ့ရိုးရာ စကားပုံအရ ဆိုရင် “မြင်းကောင်းကို ဖျက်မြင်းဖျက် ”ဆိုသလိုမျိုး အဖျက်သမား သဘောဆောင်နေပါတယ်ရှင့်။

ဥပမာ - ဆိုင်ကယ်ပြိုင်ပွဲတွေထဲ မိမိ၏ ပြိုင်ဘက်ဖြစ်လာနိုင်သူတွေကို ဘေးကပ်ကာ မှောက်အောင် ခြေထောက်နဲ့ ကန်ထုတ်သလိုမျိုး … ကိုယ့်ဘေးရှိတဲ့ မြင်းတွေကို ဝင်တိုက်ပြီး နှောင့်ယှက်ဖျက်ဆီးသည့် မြင်းအား ဆိုလိုတာပါရှင့်။

ဒါကြောင့် ဘာသာပြန်ချိန် “ မြင်းနက် “ နေရာမှာ “ဖျက်မြင်း” ဆိုတဲ့ စကားလုံးကို သုံးမယ်ဆိုရင် အဓိပ္ပာယ် ကွဲပြားသွားနိုင်ပါတယ်ရှင့်။

“ မြင်းနက် “ အဓိပ္ပာယ်ကိုက ဘယ်သူမှ မျှော်လင့်မထားဘဲ အောင်မြင်မှု အကြီးအကျယ် ရရှိလာသူ၊ အစွမ်းထက်လာသူ ကို ဆိုလိုနေပြီး .. သူ့ သဘောသဘာဝက Positive (အကောင်းမြင်) သဘောဆောင်ပါတယ်။

ဒါကြောင့် အထင်သေးခံရတဲ့ အဆင့်ကနေ ထိပ်ဆုံးကို တက်လှမ်းသွားတဲ့ ဇာတ်လိုက် သို့မဟုတ် ဇာတ်ကောင်တွေကို တင်စားကြတာပါ။

“ဖျက်မြင်း” .. သူက နာမည်မှာကို Negative (အပျက်သဘော) ဆောင်နေပါတယ်။ တော်နေ၊ တက်နေတဲ့သူကို မနာလို၍ဖြစ်စေ၊ အကွက်ဆင်ပြီးဖြစ်စေ ကြားကနေ နှောင့်ယှက်ဖျက်ဆီးသူကို ဆိုလိုတာပါ။

ဒါကြောင့် နိဂုံးချုပ်ရရင် ရှန်းရှစာစဉ်တွေမှာ သုံးတဲ့ “မြင်းနက်”ရဲ့ သဘောသဘာဝနဲ့ “ဖျက်မြင်း” ရဲ့ သဘောသဘာဝဟာ မတူညီတဲ့အတွက် တိုက်ရိုက်အစားထိုး သုံးဖို့ မသင့်တော်ဘူး ထင်မိပါတယ်ရှင့်။

🤍HappyBirthdayToMe🤍
🤍Thankyouforsupport🤍

မင်မင် ဒီလိုတွေ ပြောလို့ ဆရာကြီးလုပ်တယ် မထင်ပါနဲ့။ မင်မင် စာစဉ်ကို လာဖတ်ကြည့်ပါ။ အမှားပေါင်း သောင်းခြောက်ထောင် တွေ့ရပါလိမ့်မယ်။ စာဖတ်သူတွေ ဖြည့်ဖတ်ပေးနေလို့ ဆက်ရပ်တည်နေနိုင်တာပါရှင့်။

ချစ်တဲ့မင်မင် အပြုံးလေး

တစ်နေ့က တင်လိုက်တဲ့ ပိုစ့် ကြောင့် လူတချို့ မင်မင်ကို မကျေနပ်ဖြစ်တာတို့၊ မုန်းနေမှာတို့ သိပါတယ်။ ဒါပေမဲ့ မင်မင် အဲ့ဒါတွေကို လိုက်ဂရုစိုက်နေရင် ဒီနေ့ ဒီနေရာတောင် မရောက်လာပါဘူး။ အဲ့တော့ နဂိုတည်းက ဘယ်သူ့ကိုမှ ဂရုမစိုက်သလို၊ အခုလည်း ဂရုမစိုက်ပါဘူးရှင့်။

ဒီနေ့လည်း AI အကြောင်းထပ်ပြောပြဦးမှာပါ။

တကယ်ဆို မင်မင်က သူများကိစ္စ လိုက်ပါနေရင် ကိုယ့်အလုပ်ပျက်လို့၊ ဘယ်ကိစ္စကိုမှ တစ်ခါမှ ဝင်မပါခဲ့ဘူး။

အခုလို ဘာသာပြန်နည်း ပိုစ့်တင် ပြောတာတောင် …

ကိုယ်တိုင်က ဖတ်နေရင်း စာလုံးဝ မဖတ်ချင်တော့တဲ့ စိတ်တွေပေါက်လာတာရယ်၊ သြော် .. ဒီလူတွေထဲ ငါ့လိုမျိုး စလုပ်လုပ်ခြင်း ဘာမှနားမလည်လို့ မှားနေသူတွေ ရှိမှာပဲ ဆိုတဲ့စိတ်နဲ့ တင်ခဲ့တာပါ။

ဘာမှမသိတာထက်စာရင် .. တစ်ခုစ နှစ်ခုစ သိပြီး ပြင်လိုက်နိုင်တာနဲ့ နဂိုကထက်တော့ ပိုကောင်းသွားမှာပဲ။ အဲ့လို ကောင်းတဲ့စိတ်နဲ့ တင်တာဖြစ်လို့လည်း မင်မင် အချိန်ပေးလုပ်ဖြစ်တာပါ။

AI အကြောင်းပြောရရင် အကုန်သိပြီးသားနေမှာပါ။ မင်မင် အဓိက ပြောချင်တာက ဘယ်လိုနည်းနဲ့ ဘာသာပြန်ပါစေ Google ခေါက်ပြီး မူရင်းကို ဖတ်တတ်တဲ့ အဆင့်ထိတော့ အနည်းဆုံးရှိရပါမယ်ရှင့်။

ဘာလို့လဲဆိုတော့ AI ရဲ့ ဘာသာပြန်မှုတွေက မမှန်လို့ပါ။ မမှန်တာမှ ဝါကျတည်ဆောက် ပုံတောင် မမှန်ပါဘူး။

ဥပမာ -

AI ဘာသာပြန် -

" ဒါနဲ့ မင်း ဝါးမြိုထားတဲ့ သွေးအမြုတေကိုကော အခြေအနေ ဘယ်လိုလဲ "

မူရင်းရဲ့ အဓိပ္ပာယ်အမှန် -

" ဒါနဲ့ မင်း သွေးအမြုတေကို ဝါးမြိုပြီးသွားပြီမလား၊ အခြေအနေ ဘယ်လိုလဲ "

……………..

AI ဘာသာပြန် -

“ နမ်းပါ .. နမ်းပါ “

ဝူကျိ နှင့် ရှန်းရှန်း ကို နမ်းရန် ကလေးများက အားပေးကာ အထင်သေးစွာဖြင့် လှောင်ပြောင်လိုက်ကြသည်။

မူရင်းရဲ့ အဓိပ္ပာယ်အမှန် -

“ နမ်းပါ .. နမ်းပါ “

ဝူကျိ နှင့် ရှန်းရှန်း ကို နမ်းရန် ကလေးများက အားပေးကာ စနောက်လိုက်ကြသည်။ ( စနောက် တိုက်တွန်းကြသည်။ စနောက် မြောက်ပေးကြသည်။ ) ဘယ်လိုသုံးသုံးပါ။
…………………….

AI ဘာသာပြန် -

ဝူကျိ၏ ရှန်းရှန်းက အစီအစဉ်ကို နားမလည်သော်လည်း လုပ်ဆောင်ပေးရန် သဘောတူလိုက်၏။

မူရင်းရဲ့ အဓိပ္ပာယ်အမှန် -

ရှန်းရှန်းမှာ ဝူကျိ၏ အစီအစဉ်ကို နားမလည်သော်လည်း လုပ်ဆောင်ပေးရန် သဘောတူလိုက်လေ၏။
..................

AI ဘာသာပြန် -

တစ်ခန်းလုံး ပြည့်နှက်သွားသော ဓားချီကို ကြည့်ပြီး ဝူကျိ တအံ့တဩဖြင့် ...

“ ဒီလောက်တောင် ကြောက်ဖို့ကောင်းတဲ့ ဓားချီ ဟုတ်လား “

မူရင်းရဲ့ အဓိပ္ပာယ်အမှန် -

တစ်ခန်းလုံး ပြည့်နှက်သွားသော ဓားချီတွေကို ကြည့်ပြီး ဝူကျိ တအံ့တဩဖြင့် ...

“ ဘယ်လောက်တောင် ကြောက်ဖို့ကောင်းလိုက်တဲ့ ဓားချီလဲ “
................

AI ဘာသာပြန် -

" ဒါဆို ရှင်က အရင်တုန်းက ကျွန်မ မလှဘူးလို့ ပြောချင်တာလား "

မူရင်းရဲ့ အဓိပ္ပာယ်အမှန် -

" ဒါဆို ရှင် ပြောချင်တာ အရင်တုန်းက ကျွန်မ မလှဘူးပေါ့ "

( နောက်ဆုံးက ‘ ပြောချင်တာ ‘ ဆိုတဲ့ ဝါကျကို အလယ်ပြန်တင်ပေးလိုက်တာလေးပါ )

ဒါက AI ရဲ့ ရှေ့၊ နောက်၊ အလယ် ဝါကျ တည်ဆောက်ပုံ မှားယွင်းနေမှုတွေပါပဲ။ အဓိပ္ပာယ်အမှားတွေ၊ နာမည် အမှားတွေကတော့ ပြောဖို့တောင် မလိုတော့ဘူးထင်တယ်။ တစ်ချို့အမှားတွေဆို ဇာတ်လမ်းတစ်ပိုဒ်လုံးကို လွဲချော်သွားစေတာ။ မင်မင် ဖတ်နေရင်းနဲ့ နောက်ဆုံးပိုင်းရောက်မှ .. အော် ဒါက ဒီလို ပြောတာပါလားဆိုပြီးသိတယ်။

( ဆောင်းရာသီဖြစ်သဖြင့် အလွန်ခြောက်သွေ့နေပြီး မီးလောင်နှုန်းက အလွန်မြန်ဆန်လေသည် ) ဒါတွေလည်း ဖတ်ဖူးပါတယ်။

စာစဉ်ဇာတ်လမ်းကောင်းလို့ ဝယ်ဖတ်ပြီးမှ ဆက်မဝယ်ဖတ်ဖြစ်တော့တာ ဒီပြဿနာတွေ ကြောင့်ပါပဲ။ အဲ့လိုနဲ့ စာစဉ်က မရောင်းရတော့ ဘာသာပြန်သူကလည်း ရှေ့ဆက်ဖို့ အဆင်မပြေတွေ ဖြစ်ကုန်တာပါ။

ဒီပြဿနာကို ဖြေရှင်းဖို့က တစ်နည်းပဲရှိပါတယ်။ ကိုယ် ဒီနေ့ ၈ ပိုင်း ဘာသာပြန်မယ်ဆို မူရင်းမှာ ၂၈ ပိုင်းထိကြိုဖတ်ပါ။ လုံးဝ မပျင်းပါနဲ့။

အဲ့လိုဖတ်ထားရင် ဘာကောင်းကြိုးတွေ ရှိလာမလဲဆိုတော့ …

မူရင်းက နာမည်တွေကို ရှေ့တစ်မျိုး၊ နောက်တစ်မျိုး ဖြစ်နေတာတွေ ကြိုသိပြီး ကိုယ်သုံးမယ့် အဆင်ပြေဆုံး တစ်ခုကို ရွေးနိုင်မယ်။ မူရင်းမှာ ဘယ်လို နာမည်ပြောင်းသွားလို့ပါ ဆိုပြီး စာစဉ်ထဲ ထည့်မပြောရတော့ဘူး။

ကိုယ်တိုင် မရေးနိုင်လို့ ( သို့ ) အပိုင်းများများ ရအောင်လို့ AI ကို ရေးခိုင်းရင်တောင် ခုနလို ဝါကျ တည်ဆောက်ပုံ မမှန်တာတွေ ပြန်စစ်တာနဲ့ တန်းသိလာမယ် .. စသဖြင့် အများကြီးပဲပေါ့။ အကုန်သာရေးနေရင် အရှည်ကြီးဖြစ်သွားမှာမို့လို့ ဒီလောက်နဲ့ ရပ်ပါမယ်နော်။ ကိုယ်တိုင် လုပ်ကြည့်ရင် အကျိုးကျေးဇူးတွေ တန်းသိလာမှာပါ။

မင်မင်ဆို အပိုင်း ၁၀၀ ထိ ကြိုဖတ်တယ်။ ဖတ်ဖို့ အချိန်မလောက်ရင် VIP မှာ ခွင့်တစ်ရက် တောင်းပြီးတော့ကို ကြိုဖတ်ပြီး ဇာတ်လမ်း နားလည်အောင် အရင်လုပ်တာ။ အဲ့ဒါတောင်မှ အခုထိ မှားတာတွေ ရှိနေတုန်းပါပဲ။

အဲ့တော့ မင်မင်ပြောသလို ဘယ်လိုနည်းနဲ့ ဘာသာပြန်ပြန် .. Google ခေါက်ပြီး မူရင်းကို ဖတ်တတ်တဲ့ အဆင့်ထိတော့ အနည်းဆုံးရှိရပါမယ်ရှင့်။

မဟုတ်ရင် စာစဉ်က ဇာတ်လမ်း အရမ်းကောင်းနေရင်တောင် ရောင်းရဖို့ မလွယ်သလို .. ဒီအလုပ်နဲ့လည်း တည်ငြိမ်တဲ့ ဝင်ငွေတစ်ခု ရရှိဖို့ လုံးဝ မဖြစ်လာနိုင်တော့ပါဘူး။

အဓိက ပြဿနာက အတွေ့အကြုံမရှိတာရယ်၊ စာမဖတ်တာရယ်၊ အမှားထောက်ပြီး သင်ပေးသူ မရှိတာရယ်ကြောင့်ပါ။

နောက်ပိုင်း သင်ပေးသူရဲ့ လမ်းညွှန်ချက်နဲ့ စီနီယာတွေ ပြန်ထားတဲ့ စာအုပ်တွေထဲက အသုံးအနှုန်းတွေဖတ်ပြီး မှတ်၊ ကိုယ်ပိုင်အာဘော်လေးတွေထည့်နဲ့ တော်တော်အဆင်ပြေသွားတာ။

အဓိက ကတော့ စာဖတ်တာပါ၊ များများဖတ်လေ များများသိလေပဲ။

မင်မင် စာစဉ်ကို ဖတ်နေတဲ့ စာဖတ်သူအချို့ဆို အမှားတစ်ခုတွေ့ရင် ဒါက မူရင်းမှာဘာလဲ သွားမကြည့်ဘဲတောင် သိနေတဲ့ အဆင့်တွေရောက်နေပြီ။ သူတို့ရဲ့ ထောက်ပြမှုကနေ သင်ခဲ့ရတာတွေလည်း အများကြီးပဲ။ 🙏

မင်မင် စာဘယ်လောက် ဖတ်သလဲဆို စာစဉ် အသစ်လာပြီဆို မြို့ပြ၊ ရှေးဟောင်း၊ စနစ် ဘာထွက်ထွက် အကုန်ဖတ်တာ။

မင်မင် Wunzinn တစ်ခုတည်းပဲဖတ်တော့၊ လက်ရှိ Wunzinn မှာ တင်ထားသမျှ အကုန်နီးပါး ဖတ်ဖူးတယ်ဆိုရင် အပိုပြောတယ် ထင်ကြမလားမသိဘူး။

အဲ့ဒါတကယ်ပြောတာပါ။ မင်မင် Wunzinn မှာ စာဖတ်တာ တစ်လကို တစ်သိန်းအထက်ပဲ။

ဒါပေမဲ့ အခုတော့ ဖတ်ရင်း ဖတ်ရင်း ပျင်းလာလို့ ဘာဖတ်ရမှန်းတောင် မသိတော့ဘူး။

အဓိက ပျင်းဖို့ကောင်းတာ စာစဉ်ကြောင့်မဟုတ်ပဲ သုံးထားတဲ့ စကားလုံး အသုံးနှုန်းတွေက အရမ်းဖောင်းပွပြီး မကျစ်လစ်တော့တာကြောင့်ပါ။ ဒါကြောင့် ဖတ်နေရင်း ရပ်ထားလိုက်တာတွေ တော်တော်များနေပြီ။

ဒါကြောင့်လည်း ဒီနေ့ Post ကို တင်လိုက်တာပါရှင့်။

မင်မင် ဆရာကြီးမဟုတ်ပါဘူး၊ ကိုယ့်လို စမ်းတဝါးဝါး သွားနေသူတွေအတွက် တစ်ခုလောက် အဆင်ပြေသွားရင်တောင် ရတယ်ဆိုတဲ့ စိတ်၊ စာစဉ်သစ်တွေကို လက်ရာ ကောင်းကောင်းလေး ဖတ်ချင်တဲ့စိတ်နဲ့ .. သုံးနှစ်တာ အတွေ့အကြုံ တချို့ကို တင်ပေးလိုက်တာပါရှင့်။

အဆုံးထိ ဖတ်ပေးတဲ့အတွက် ကျေးဇူးအများကြီးတင်ပါတယ်။

ချစ်တဲ့မင်မင် အပြုံးလေး

ဒီ Post က မည်သူ တစ်ဦးတစ်ယောက်ကိုမှ ပြောခြင်းမဟုတ်သလို၊ မကောင်းပြောခြင်းလည်း မဟုတ်ပါဘူးရှင့်။

စာဖတ်သူတစ်ယောက်ကို ဖတ်နေရင်း ပျင်းသွားစေသည့် "ဖောင်းပွနေသော စကားလုံး" နှင့် "ကျစ်လစ်သော စကားလုံး" ဥပမာများ ..

အပိုင်း (၁) -

ဒီလက်နက်က အောက်တန်းစား လက်နက်ပဲ။

( ဒီလက်နက်က အဆင့်နိမ့် လက်နက်ပဲ )

အောက်တန်းစား = အဆင့်နိမ့်
..

ဒီကောင့်ကို အတိုတောင်းဆုံး အချိန်အတွင်း သတ်မှရမယ်။

( ဒီကောင့်ကို အချိန်တိုအတွင်း သတ်မှရမယ် )

အတိုတောင်းဆုံး အချိန်အတွင်း = အချိန်တိုအတွင်း
..

ဝတ်စုံနက်ကို ဆင်မြန်းထားသည့် အဘိုးအိုတစ်ဦး ဗြုန်းခနဲ ပေါ်လာသည်။

( ဝတ်စုံနက်နှင့် အဘိုးအိုတစ်ဦး ရုတ်တရက် ပေါ်လာသည် / ဝှစ်ခနဲ ပေါ်လာသည်။ )

ဝတ်စုံနက်ကို ဆင်မြန်းထားသည့် = ဝတ်စုံနက်နှင့်
..

လင်သေမယား တစ်ယောက်က ဘာလုပ်နိုင်မှာ မို့လို့လဲ။

( မုဆိုးမ တစ်ယောက်က ဘာလုပ်နိုင်မှာ မို့လို့လဲ )

လင်သေမယား = မုဆိုးမ
..

ဒီပြိုင်ပွဲမှာ လူမည်းမြင်းလေး တစ်ကောင်တော့ ပေါ်လာပြီ။

( ဒီပြိုင်ပွဲမှာ မြင်းနက် တစ်ကောင်တော့ ပေါ်လာပြီ )

လူမည်းမြင်းလေး = မြင်းနက်
..

သူမက ကျွန်တော့်ရဲ့ ကျင့်ကြံခြင်းဆိုင်ရာ ဇနီးပဲ။

( သူမက ကျွန်တော့်ရဲ့ တာအိုလက်တွဲဖော်ပဲ )

ကျင့်ကြံခြင်းဆိုင်ရာ ဇနီး = တာအိုလက်တွဲဖော်
..

တော်တော်လှသည့် ယောကျာ်းပင်။

( တော်တော်ချောမောသည့် ယောကျာ်းပင် )

မိန်းကလေးဆို = လှ ၊ ယောကျာ်းလေးဆို = ချော (သို့) ချောမော
..

အတိတ်က ဖြစ်ရပ်များကို သူ၏ ဉာဏ်ပညာထဲတွင် ပြန်တွေးလိုက်သည်။

( အတိတ်က ဖြစ်ရပ်များကို သူ၏ မှတ်ဉာဏ်ထဲတွင် ပြန်တွေးလိုက်သည် )

ဉာဏ်ပညာ = မှတ်ဉာဏ် (အတွေးပုံရိပ်များနှင့် အတိတ်ကို အောက်မေ့ခြင်း နေရာများတွင် ဉာဏ်ပညာဟု မသုံးဘဲ "မှတ်ဉာဏ်" ဟုသာ သုံးကြပါတယ်)
..

ဒီကိစ္စကို ဂိုဏ်းရဲ့ ရှာဖွေရေးအဖွဲ့ဆီ အကြောင်းကြားပြီး ရှာခိုင်းလိုက်။

( ဒီကိစ္စကို ဂိုဏ်းရဲ့ ထောက်လှမ်းရေးအဖွဲ့ဆီ အကြောင်းကြားပြီး ရှာခိုင်းလိုက် )

ရှာဖွေရေးအဖွဲ့ = ထောက်လှမ်းရေးအဖွဲ့ (နှစ်ခုစလုံးကို သူ့နေရာနဲ့သူ သုံးပါတယ်။

မင်မင်ကတော့ အနောက်မှာ ရှာခိုင်း ဆိုတဲ့ စကားလုံးပါနေတော့ ရှာ နှစ်ခု ထပ်နေလို့ရယ်၊ ထောက်လှမ်းရေးအဖွဲ့ ဆိုတာကို ပိုသဘောကျလို့ အဲ့လိုပဲ သုံးလိုက်တာပါ)
..

ဒါလေးက ဝါကျကို ကျစ်လစ်ပြီး တိုတိုနဲ့ ထိမိအောင် ပြောင်းလဲလိုက်ခြင်းပါ....

သူ့ အရှေ့မှောက်ရှိ အဆုံးသတ်မမြင်ရသော ကျယ်ပြောလှသည့် ကောင်းကင်ပြာကြီးကို ကြည့်လိုက်သည်။

( သူ့ အရှေ့ရှိ အဆုံးအစမဲ့သော ကောင်းကင်ပြာကြီးကို ကြည့်လိုက်သည်။ )

အရှေ့မှောက်ရှိ = အရှေ့ရှိ

အဆုံးသတ်မမြင်ရသော ကျယ်ပြောလှသည့်
ကောင်းကင်ပြာကြီး = အဆုံးအစမဲ့သော ကောင်းကင်ပြာကြီး
..

ဒီနေ့ ငါ အလှူရှင် လုပ်ပြီး၊ လူတိုင်းကို အရက်တိုက်ပါ့မယ်။

( ဒီနေ့ ငါ ဒကာခံပြီး ၊ လူတိုင်းကို အရက်တိုက်မယ် )

အလှူရှင် လုပ်ပြီး = ဒကာခံပြီး
..

ဟ .. မင်း လက်စွမ်းရှိလှချည်လား။

( ဟ .. မင်း လက်ဇောင်းထက်လှချည်လား )

လက်စွမ်း = လက်ဇောင်း
..

ဝူကျိ ဆူပူနေသော ရေနွေးအိုးကို မလိုက်သည်။

( ဝူကျိ ဆူပွက်နေသော ရေနွေးအိုးကို မလိုက်သည် )

ဆူပူနေသော = ဆူပွက်နေသော
..

မမေ့ပစ်ပါနဲ့ ငါတို့ရဲ့ အဓိက ပစ်မှတ်က ဘယ်သူလဲ ဆိုတာ။

( မမေ့လိုက်နဲ့ .. ငါတို့ရဲ့ အဓိက ပစ်မှတ် ဘယ်သူလဲဆိုတာ )

မမေ့ပစ်ပါနဲ့ = မမေ့လိုက်နဲ့ (မင်မင် ဘယ်တော့မှ စကားလုံးနှစ်လုံး ထပ်နေတာတွေ မသုံးပါဘူး။

အဓိက ပစ်မှတ်က ဖတ်ရထောက်တယ်ထင်လို့ ပစ်မှတ်ရဲ့ က ကို ဖြုတ်လိုက်ပါတယ်)
..

မိုးရွာသကဲ့သို့ ကျဆင်းလာသော လက်သီးများကြောင့် ဝူကျိ မျက်လုံးပြူးသွားသည်။

( မိုးသီးမိုးပေါက်လို ကျဆင်းလာသော လက်သီးချက်များကြောင့် ဝူကျိ မျက်လုံးပြူးသွားသည် )

မိုးရွာသကဲ့သို့ = မိုးသီးမိုးပေါက်လို

လက်သီးများ = လက်သီးချက်များ
..

တစ်ဖက်လူ၏ ခွန်အားကြောင့် ဝူကျိ မျက်လုံးထဲတွင် ကြီးလေးသော အရိပ်ယောင်များ ဖြစ်တည်လာသည်။

( တစ်ဖက်လူ၏ ခွန်အားကြောင့် ဝူကျိ မျက်လုံးထဲတွင် လေးနက်မှုများ ဖြစ်တည်လာသည် )

ကြီးလေးသော အရိပ်ယောင်များ = လေးနက်မှုများ
..

ဒီနေ့ကစပြီး ကျွန်တော့်အသက်က သခင် အသက်ပဲ။

( ဒီနေ့ကစပြီး ကျွန်တော့်အသက်က သခင် အပိုင်ပဲ )

သခင် အသက်ပဲ = သခင် အပိုင်ပဲ
..

သူတို့လုပ်ရပ် အကုန်လုံးကို အစနမကျန်အောင် သေချာစောင့်ကြည့်ခဲ့တယ်။

( သူတို့လုပ်ရပ် အကုန်လုံးကို အစအဆုံး သေချာစောင့်ကြည့်ခဲ့တယ် )

အစနမကျန်အောင် = အစအဆုံး
..

သူပြောတဲ့ အတိုင်းမှန်ရင် ငါလက်ပြန်ထောက်ပြီး ချေးစားပြမယ်။

( သူပြောတဲ့ အတိုင်းမှန်ရင် ငါ လေးဘက်ထောက်ပြီး ချေးစားပြမယ် )

လက်ပြန်ထောက်ပြီး = လေးဘက်ထောက်ပြီး
..

ဒီဆေးပင်ရဲ့ သက်တော်က အနှစ်လေးဆယ်ရှိပြီ။

( ဒီဆေးပင်ရဲ့ သက်တမ်းက အနှစ်လေးဆယ်ရှိပြီ )

သက်တော် = သက်တမ်း
..

ဒီကလေးက နို့တောင်မကွာသေးဘူးမလား။

( ဒီကလေးက နို့တောင်မပြတ်သေးဘူးမလား )

နို့တောင်မကွာ = နို့တောင်မပြတ်
..

ဒါတွေထဲ တော်တော်များများက ဘာသာစပြန်ခါစ မူရင်းအတိုင်းပြန်ရင်း မှားသွားတတ်တာတွေပါ

မင်မင်ကိုယ်တိုင်လည်း ဘာသာစပြန်ခါစက အခုပြောထားတဲ့ အရာတွေထက်တောင် အမှားတွေ ပိုများဖူးပါသေးတယ်။