أبشرك خلصوا مابقوا عندي هواي
كل المشتريهم رخصوا بيه
أصافحهم واحس باطراف اديهم غيظ
كاتل منهم ومادافع الدية
بسد بوساتهم دفنوا شكَد أنياب
واكَول يجوز جانت عن حسّن نية
ويمر طاريّويذكرولي للشينات
واصد لغيبه اسمي التنوكل نية
وانه الجنت اضل واكَف بالأستعداد
من أسمع عزيز يفوت طارية
حسبالي العدد بي ثمرة من يزود
وعن قلة الواحد تفرق المية
بس تالي ادركت طين الكَلوب اصناف
والعِشرة الطويلة تريد نوعية
على كلًّ عِشت ماخذت بس طيت
وي ليل المجازة الماشفت ضيّة
وينه وينه الالكاه بيه جاي يبيع
وين الانه منطي من هوى الرية
والزم جفني خاف من ارمش يزعلون
واتناسه الحجاية البذني محجية
عرفتلها كَمت مازاعل اليرحون
ولا ع الباب اظل متاني ليلية
