من الحاجات اللي بتكون عائق بينك وبين إصلاح نفسك هي عدم معرفة حقيقة الدنيا وسُنن ربنا فيها، ودا هيخليك عايش متكدر ومش مبسوط!
مثلًا الدنيا كل حاجة فيها مؤقتة عشان كدا ربنا وَجِّهنا وقال:﴿لِّكَيْلَا تَأْسَوْا عَلَىٰ مَا فَاتَكُمْ وَلَا تَفْرَحُوا بِمَا آتَاكُمْ ۗ وَاللَّهُ لَا يُحِبُّ كُلَّ مُخْتَالٍ فَخُورٍ﴾..
عشان متتحسرش على حاجة وبردو متتعلقش أوي بأي حاجة سواء أشخاص أو ممتلكات أو منصب أو شعور معين.
الدنيا مافيش حاجة فيها كاملة، لازم يشوبها شيء من النقص زي ما مثلًا فلان كريم جدًا لكنه عصبي أو فلان شغله فلوسه كويسة بس متعب جدًا وهكذا..
الدنيا دار ابتلاء؛ فمتتوقعش إنك هتكون فيها دايمًا مرتاح
قال تعالى: {لَقَدْ خَلَقْنَا الْإِنسَانَ فِي كَبَدٍ}.
الدنيا مش دار القصاص النهائي!
فإنت لازم تتقبل أن فيه مظالم معينة وحقوق مش هتترد غير يوم القيامة.
الدنيا فيها أُنس باللي حواليك، بس فيها بردو احتمال لأذاهم أو جهلهم عليك في بعض الأحيان.
وغيرها كتير من السُنن اللي لو مش عارفها هتتفاجيء بحاجات كتير، وهتاخد ردود أفعال أكبر من اللازم، وهتفضل قلقان ومتوتر وخايف.
لكن لو عرفتها حياتك هتكون أهدى، وهتكون مطمئن أكتر، ومتوكل على الله أكتر، وعارف تاخد قرارات وردود أفعال بشكل أحسن ليك في الدنيا والآخرة.
افتح القرآن واقرأ ومع الوقت كل السُنن دي هتترسخ في عقلك وقلبك، وحياتك هتكون مطمئنة أكتر بإذن الله.
..
September 1, 2026 83 5
