ترس روحي الضباب وبينت وياك
كلي بروحك أمشي وجرحي ماشفتة
أنا بالنسمة أعثر وانتَ قيس الحال
مو جدمي وراك خيالي ما شلتة
وأجي بواهس عذر وحروفي من تطيح
واتبدة ع وجهك مستحة وسكتة
وأنخل غير وجهك واليطيح تراب
وانكتهم واهزهم بس تظل انتَ
رمح فرگاك اجاني مسابگ وي الريح
ماقصرت تسلم بالنفس جبتة
بس المحترگ يفهم حچي الدخان
ويعرف حرورتة ويفهم سبب علتة
مثل عاشگ بغربة ومرة وكت غروب
يفرفح من يمر طاري الهوى يموتة
انا بخصر السنابل چم حلم ضميت
وطعم شبگة المنجل من رحت ضگتة
الندى عمرة مسافة ومن يطيح يموت
وانا بعمر الندى وفجرك وصل وكتة
اذا فوگ الورد لو فوگ صخرة يطيح
ما تفرق بعد لو عمري طيحتة
انا مبلل عشگ يَاليبست ملگاك
رحت وخيال وجهك عيني حاضنتة
واضفر بالخلگ بلكت گصيبة يصير
وضوة چفوفك بصدري الگاها ضافرتة
واغص بالليل واگصر والمسافة تطول
واجي وتعثر عيوني بكل اثر عفتة
واجي مغيم سهر يمك وانگط ليل
وطرت مو بالسمة لا بالحچي الكلتة .
