قال الامام الصادق ع : ( نحلت جدتي فاطمه حتى صارت كالخيال )
……………………………………………………………
كالخيال .. ورده ذبلها الكسر
كالخيال .. و انذبح غصن العمر
هذا حال امك يل اموزّر هظم
حيل نحلت والجلد لاح العظم
آ يمهدي .... آ يمهدي
……………………………………………………………
الجانت تزهي ليل نهار . امسويه البيت چن جنه
الطير امن الصبح غبّاش . ابضحكة سِنها يتغنه
وهسه الوجه ماكو امن الدمه گطره
صفرة لون من گد شدة العصره
ابوجها و رسمت اجفوف النذل سطره
اثر للموت ظلت عينها الحمره
والادين .. بيهن اتنشف الدمع
والادين .. امجرحات امن الجذع
عينها و دمعتها عن حيدر تظم
حيل نحلت والجلد لاح العظم
آ يمهدي .. آ يمهدي
……………………………………………………………
يمهدي وشدة الشدات . لو رادت هوه اتشمه
ضلعها و النفس مرتين . صاعد نازل ايلجمه
يعني الريّه تتجرح ابكل شهگه
الضلوع اتكسرن واعليها منطبگه
ابلون امتونها ريّتها هم زرگه
يمهدي امك طوال اليوم مختنگه
والحُسين .. ايكلها اصيرلج هوه
والحُسين .. دمعه والحسره سوه
اتكله باجر حافر الجسمك يطم
حيل نحلت والجلد لاح العظم
آ يمهدي .... آ يمهدي
……………………………………………………………
يمهدي الظهر شكل اهلال . امك صارت امحدبه
عمر اثمنطعش لاكت . ابـ ميه الشافها ايحسبه
السبحه الخضره ظلت تنحب اعليها
من گد ما تشاهد رجفة ايديها
ومن گد الحراره امن المرض بيها
نار الجبهه حتى التربه تچويها
بالصلاه .. تسمع اصوات السمه
بالصلاه .. كلها تصرخ فاطمه
الحور والاملاك بالنوح ولطم
حيل نحلت والجلد لاح العظم
آ يمهدي .... آ يمهدي
……………………………………………………………
اليتوجّع ابلايه اشعور . چلمة آه يطلعها
بس الزهره تحبسها . خاف الحسن يسمعها
الزاد اتصبّه هي ورغم متألمه
لان حسين ابد ما ياكل اللگمه
الا الخبزه من ايد ام حسن امه
يشبع من يشوف ابوجهه مبتسمه
اتشربه ماي .. وچفها يم حلگه ارتعش
اتشربه ماي .. تدري بيه يشبع عطش
اوليدها امن الماي باجر ينحرم
حيل نحلت و الجلد لاح العظم
آ يمهدي .... آ يمهدي
……………………………………………………………
مو بس ضلع يالمهدي . گلب امك اشد كسره
انعصرت مره يم الباب . ولمحسن الف عصره
ابنيّها الما تهنت تنظر ارسومه
ومن صيحة يـ محسن غدت محرومه
وسط المهد ما شافت اله نومه
ولا لفت اگماط اخضر على اهدومه
وللطفوف .. يسرح ابفاطم فكر
وللطفوف .. طفل والدم منثر
بالسهم عبدالله اصبح منفطم
حيل نحلت و الجلد لاح العظم
آ يمهدي .... آ يمهدي
……………………………………………………………
عافت ضلع والبسمار . الزهره ابتها ملتهيه
تدري الجذع باجر سوط . وفوگ النوك مسبيه
ييمه وبابي كلش يشبه خيامج
باجر جمر يمه ايحفّر اجدامج
اخيّج ينولي و ينّحر جدامج
وموش ابروحج اتحيرين بيتامج
هم يموت .. خدرج العاش ابفخر
هم يموت .. ويه عباس الگمر
اشعظم ليل الوحشه يا يمه اشعظم
حيل نحلت و الجلد لاح العظم
آ يمهدي .... آ مهدي
……………………………………………………………
✍️ ( سيد خضر الزاملي )