ညောင်ဦးနှင့် ကျောက်ပန်းတောင်းတွင် စစ်ကြောင်းထိုးနေသည့် စစ်တပ်က နေအိမ် ၁၀၀ ကျော်ကို မီးရှို့ဖျက်ဆီး၊
▪️ထောင်နှင့်ချီသော ပြည်သူများ ဘေးလွတ်ရာ ဆက်လက် တိမ်းရှောင်နေရ
စက်တင်ဘာလ ၇ ရက်
မန္တလေးတိုင်း၊ ညောင်ဦးမြို့နယ်နှင့် ကျောက်ပန်းတောင်းမြို့နယ်တို့တွင် စစ်ကြောင်းထိုးနေသည့် အကြမ်းဖက် စစ်တပ်က နေအိမ် ၁၀၀ ကျော်ကို မီးရှို့ဖျက်ဆီးခဲ့ပြီး ထောင်နှင့်ချီသော ပြည်သူများ ဘေးလွတ်ရာ ဆက်လက် တိမ်းရှောင်နေရကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဇူလိုင်လပိုင်းမှာ စတင်၍ ညောင်ဦးမြို့နယ်အတွင်း စစ်ကြောင်းထိုးနေသော အကြမ်းဖက် စစ်တပ်သည် ဇူလိုင်လ ၂၂ ရက်နေ့တွင်မီးလောင်ဖျားရွာမှ နေအိမ် ၃ လုံး၊ ဇူလိုင်လ ၂၄ ရက်နေ့မှ စတင်ပြီး ထက်ယာကုန်းရွာမှ နေအိမ် ၁၃ လုံး၊ သဲရာချောင်းရွာမှ နေအိမ် ၃၂ လုံး၊ ကျွန်းဘိုကန်ရွာမှ နေအိမ် ၁၄ လုံး၊ သံချေးကန်ရွာမှ နေအိမ် ၁၀ လုံးတို့ကို မီးရှို့ဖျက်ဆီးခဲ့ကြောင်း သိရသည်။
ထို့ပြင် ဩဂုတ်လ ၁၆ ရက်နေ့တွင် ကျောက်ပျဉ်ကန်ရွာမှ နေအိမ် ၂၈ လုံး၊ ဩဂုတ်လ ၂၄ ရက်နေ့တွင် စဉ့်ကူရွာ နေအိမ် ၁၆ လုံး၊ ပြည်တော်သာရွာမှ နေအိမ် ၄ လုံးနှင့် ပခုက္ကူကျွန်းရွာမှ နေအိမ် ၄ လုံးတို့ကို ထပ်မံ မီးရှို့ဖျက်ဆီးခဲ့ကြောင်း၊ ထိုစစ်ကြောင်းသည် ညောင်ဦးမြို့နယ် အတွင်း လှည့်လည် စစ်ကြောင်းထိုးနေခြင်းဖြစ်ပြီး စက်တင်ဘာလ ၁ ရက်နေ့တွင်လည်း စဉ့်ကူရွာမှ နေအိမ် ၃ လုံးကို ထပ်မံ မီးရှို့ဖျက်ဆီးခဲ့ကြောင်း သိရှိရသည်။
ထိုအကြမ်းဖက် စစ်တပ် စစ်ကြောင်းကြောင့် မီးရှို့ဖျက်ဆီးခံရသော ကျေးရွာများမှ ပြည်သူများ အပါအဝင် အနီးအနားရှိကျေးရွာများမှ ထောင်နှင့်ချီသော ပြည်သူများ ဘေးလွတ်ရာ ထွက်ပြေးတိမ်းရှောင်နေရဆဲဖြစ်ကြောင်း သိရသည်။
"စစ်ခွေး စစ်ကြောင်းက ညောင်ဦးနယ်ထဲကို ဇူလိုင်လပိုင်းတည်းက စပြီး ဆက်တိုက်ကို စစ်ကြောင်းထိုးနေတာ အခု ကျနော်တို့ ကောက်ခံထားတဲ့ စာရင်းတွေအရ နေအိမ် ၁၀၀ ကျော်မီးရှို့ဖျက်ဆီးခံထားရတယ်။ အဲ့ခွေး စစ်ကြောင်းက လမ်းပိုင်းတွေကို အပြည့်အဝ ထိန်းချုပ်နိုင်ဖို့အတွင် ရည်ရွယ်ပြီး စစ်ကြောင်းထိုးနေတာ" ဟု ဒေသပြည်သူတစ်ဦးက ပြောဆိုသည်။
အလားတူ ကျောက်ပန်းတောင်းမြို့နယ်တွင်လည်း စက်တင်ဘာလ ၂ ရက်နေ့က စတင်ကာ စစ်ကြောင်းသည် ဒရုန်းများနှင့် ခဲယမ်းများ အပြည့်တင်ဆောင်လာသည့် ကား ၁ စီးနှင့်အတူ ပုပ္ပါးဘက်မှ ဆင်းလာခဲ့ပြီး ပိုဇိုလန် ဘိလပ်မြေစက်ရုံ၊ တောင်ပုရွာ၊ ကံစပ်ကုန်းရွာနှင့် ငရံ့ကုန်းရွာတို့ကို ဖြတ်သန်းကာ ချိုင်းကျေးရွာသို့ ရောက်ရှိချိန်တွင် နေအိမ် ၇ လုံးခန့်ကို မီးရှို့ဖျက်ဆီးခဲ့ကြောင်း သိရှိရသည်။
ယင်းစစ်ကြောင်းသည် စက်တင်ဘာလ ၅ ရက်နေ့ နံနက်ပိုင်းတွင် ၎င်းတို့ ညအိပ်တပ်စွဲခဲ့သည့် သုံးအိမ်ကုန်းကျေးရွာမှ နေအိမ်များကို မီးရှို့ဖျက်ဆီးခဲ့သည့်အပြင် သီးကုန်းကျေးရွာကိုလည်း မီးရှို့ခဲ့ရာ နေအိမ် ၂၀ ကျော် မီးလောင်ပျက်စီးခဲ့ကြောင်း သိရသည်။ ထို့ပြင် သုံးအိမ်ကုန်းကျေးရွာရှိ လျှပ်စစ်ထရန်စဖော်မာပုံးများကိုပါ ဖြုတ်ယူသွားကြောင်း သိရသည်။
ထိုစစ်ကြောင်းသည် တောင်ပေါ်ကျေးရွာမှ ဒေသခံများပိုင်ဆိုင်သော ဆိုင်ကယ် ၁၅ စီးနှင့် နေအိမ်များအတွင်း ရှိ တန်ဖိုးကြီးပစ္စည်းများကို ၁၀ ဘီးကားဖြင့် တင်ဆောင်ယူသွားခဲ့ကြောင်း၊ ကျေးရွာမှထွက်ခွာစဉ် စစ်ဘေးရှောင်ပြည်သူများနှင့် တွေ့ဆုံခဲ့ရာတွင်လည်း ပြည်သူများထံမှ နားကပ်၊ ဆွဲကြိုး၊ လက်စွပ်စသည့် အဖိုးတန်လက်ဝတ်ရတနာများ၊ ငွေကြေးနှင့် လက်ကိုင်ဖုန်းများကို လုယက်ယူဆောင်သွားခဲ့ကြောင်း ဒေသခံများက ပြောဆိုသည်။
ဓာတ်ပုံ - စစ်ကိုင်းတိုင်း အတွင်းရှိ ကျေးရွာတစ်ရွာကို စစ်တပ်က ညအချိန် မီးရှို့ဖျက်ဆီးခဲ့စဉ် (ပုံအဟောင်းဖြစ်သည်)
#KTM
#HlaingInfo
43
5
2September 7, 2026 1.8K 1
