Gul so‘lishi mumkin. Balki u qimmatdir. Balki shu pulga foydaliroq narsa olish mumkindir. Balki undan uzoqroq xizmat qiladigan sovg‘alar ham bordir. Ammo bir narsani ko‘pchilik erkaklar his qila olmaydi: ayol uchun gulning qadri uning narxida ham, qancha vaqt saqlanishida ham emas.
Gap gulning o‘zida emas. Gap uni berayotgan insonning e’tiborida. Ayol gulni qo‘liga olganida faqat yaproqlarni ushlamaydi, u o‘ziga bo‘lgan mehrni, qadrlanishni va “men seni o‘yladim” degan jimjit e’tirofni his qiladi. Shuning uchun ham oddiy bir dasta gul ba’zan eng qimmat sovg‘adan ham ko‘proq baxt ulasha oladi.
Erkaklar ko‘pincha narsalarning foydasini o‘lchaydilar. Ayollar esa ko‘pincha tuyg‘ularning qiymatini his qiladilar. Shu sababli gulning bir necha kundan keyin so‘lib qolishi ayol uchun muhim emas. Muhimi, o‘sha gul unga berilgan lahza, o‘sha samimiy e’tibor va qalbiga kirib borgan iliq hislardir.
Gulning yaproqlari to‘kiladi, ammo u sabab bo‘lgan tabassum xotirada qoladi. Ifori yo‘qoladi, ammo “meni eslabdi”, “meni xursand qilishni istabdi”, “men uning uchun muhim ekanman” degan tuyg‘ular uzoq vaqt yashaydi. Ba’zan ayolga katta sovg‘alar emas, aynan shunday kichik, lekin samimiy e’tibor kerak bo‘ladi. Chunki ayol qalbi qimmatbaho narsalar bilan emas, o‘zini qadrlangan his qilishi bilan baxtli bo‘ladi.
Shuning uchun gulning umrini emas, uning olib kelgan quvonchini o‘lchang. Chunki ayrim gullar bir necha kunda so‘ladi, ammo ular hadya qilgan baxt va mehr hissi ayolning qalbida yillar davomida yashaydi…)
ps: ahli oilangizdagilarga gul hadiya qilib turing)
@taqwatiy
