في النقد النصي (٩) هل وجود نص غريب عن النص الموجود في ترجمة فاندايك… — إيكونوميا للدراسات المسيحية — TG.ME

في النقد النصي (٩) هل وجود نص غريب عن النص الموجود في ترجمة فاندايك معناه إن النقد النصي بيقول بتحريف الكتاب المقدس؟ لا، في علم النقد النصي، ده ميعتبرش تحريف، ده بالعكس "تصحيح" و"استعادة" للنص الأصلي بناءً على أقدم المخطوطات. · التحريف إنك تغير النص بقصد، عشان تفسد المعنى أو تخفي حقيقة، أو تزيد حاجة متقالتش من الأساس بقصد غلط، وبجانب دا، ودا المهم جدًا، ميبقاش عندك إمكانية الرجوع للأصول الأولى عشان تصحح. لكن اللي بيحصل في النقد النصي هو العكس بالظبط: الباحثين مازادوش حاجة جديدة، هما بيصححوا النصوص والترجمات بمنهجية علمية صارمة ومنضبطة. يعني إيه اللي حصل هنا؟ تنقية وتصحيح للترجمة من بعض النصوص القليلة جدًا الدخيلة مش أصلية، مش تحريف ليها. [نصوص قليلة جدًا ومحصورة ومعروفة]. دا تصحيح. ليه منقولش إن ده تحريف؟! - علشان هدف المدققين إنهم يرجعوا لأقدم وأوثق المصادر (زي المصادر من القرن الثاني والثالث والرابع [مخطوطات، ترجمات، اقتباسات الاباء]). - يبقى لما تصحح الفقرة الكتابية، النص اللي بيتعاد بناءه يبقى أقرب للي كتبه النبي أو الرسول في الأصل، مش أبعد. فده تصحيح للترجمة، مش تبديل ولا تحريف للنص المقدس.. خصوصاً إنه صادر بأمانة وبمعايير علمية.