Hule Addis Media ( HAM) (@hulaadiss) — Telegram — TG.ME

Hule Addis Media ( HAM) (@hulaadiss) — Telegram — TG.ME

ዜና፦ ቮዳኮም በሳፋሪኮም ውስጥ ያለውን የአብላጫ ድርሻ ግዥ ማጠናቀቁን ገለጸ፤ በኢትዮጵያ ያለውን የማደግ ፍላጎትም ጠቅሷል

በደቡብ አፍሪካ መሥሪያ ቤቱን ያደረገው ቮዳኮም ግሩፕ በሳፋሪኮም ኃ/የተ/የግል ማኅበር ውስጥ የነበረውን ድርሻ በ20% በማሳደግ፣ ጠቅላላ የባለቤትነት ድርሻውን ወደ 55% አካባቢ ማድረሱንና በኬንያ እና በኢትዮጵያ የሚንቀሳቀሰውን የቴሌኮሙኒኬሽን ኩባንያ የአብላጫ ባለቤትነት መብት መረከቡን አስታውቋል።
ኩባንያው ሰኔ 23 ቀን ባወጣው ጋዜጣዊ መግለጫ፣ ሰኔ 19 ቀን የኬንያ የይግባኝ ሰሚ ፍርድ ቤት ቀደም ሲል ተጥሎ የነበረውን ዕገዳ ማንሳቱንና የቀሩት ቅድመ ሁኔታዎች በሙሉ መሟላታቸውን ተከትሎ ግብይቱ በይፋ መጠናቀቁን ገልጿል።
እንደ ኩባንያው ገለጻ፣ ለመጀመሪያ ጊዜ በታኅሣሥ 2018 ዓ.ም ይፋ የተደረገው ይህ የ2.1 ቢሊዮን ዶላር ስምምነት፤ ከኬንያ መንግሥት የ15% ድርሻን እንዲሁም ከቮዳፎን ግሩፕ የ5% ድርሻን በአንድ አክሲዮን በ34 የኬንያ ሺሊንግ መግዛትን ያጠቃልላል። የኬንያ መንግሥት በናይሮቢ የአክሲዮን ገበያ ላይ ተመዝግቦ የሚገኘውን የሳፋሪኮምን 20% ድርሻ ይዞ ይቀጥላል።
ቮዳኮም ይህ ግዥ የሳፋሪኮምን የፋይናንስ ውጤቶች በዓለም አቀፍ የፋይናንስ ሪፖርት አቀራረብ ደረጃዎች (IFRS) መሠረት እንደ ተባባሪ ኩባንያ ከመቁጠር ይልቅ፣ በቀጥታ ከራሱ የሒሳብ መግለጫዎች ጋር አጠቃሎ ለማሳየት እንደሚያስችለው ገልጿል።
ኩባንያው ይህ ግዥ በምሥራቅ አፍሪካ ያለውን ተደራሽነት እንደሚያጠናክርለት የገለጸ ሲሆን፣ በተለይም ሳፋሪኮም ወደ ሀገሪቱ የቴሌኮም ዘርፍ ከገባ ጀምሮ ወደ 14 ሚሊዮን ገደማ ደንበኞችን ያፈራባትን ኢትዮጵያን እንደ ዋና የማደጊያ ገበያ ጠቅሷታል።
የቮዳኮም ግሩፕ ዋና ሥራ አስፈጻሚ ሻሚል ጁሱብ ግብይቱ “በኬንያ እና በኢትዮጵያ የዲጂታል እና የፋይናንስ አካታችነትን በሰፊው ለማሳደግ አዳዲስ ዕድሎችን ይከፍታል” ያሉ ሲሆን፣ ኩባንያው ሥራውን እያሰፋ ሲሄድ ከሁለቱም ሀገራት መንግሥታት ጋር አብሮ ለመሥራት እንደሚፈልግ አክለዋል።

ቤተሳይዳ አሜሪካን ሜዲካል ፕላዛ በኢትዮጵያ የመጀመሪያውን የ‘ጄሲአይ’ ዓለም አቀፍ ዕውቅና ማግኘቱ ተነገረ

ቤተሳይዳ አሜሪካን ሜዲካል ፕላዛ ከጆይንት ኮሚሽን ኢንተርናሽናል (ጄሲአይ) የላቀ የሕክምና አገልግሎት ጥራትና የሕሙማን ደህንነት ማረጋገጫ ዕውቅና በማግኘት በኢትዮጵያ የመጀመሪያው ሆስፒታል ሆኗል። ይህ በሀገሪቱ የጤናው ዘርፍ ትልቅ ምዕራፍ ተብሎ የተጠቀሰው ስኬት የተሰማው ሆስፒታሉ የተመሰረተበትን አንደኛ ዓመት ባከበረበት ወቅት ነው።

የጄሲአይ ዕውቅና በዓለም አቀፍ ደረጃ በጤና ተቋማት የጥራት ቁጥጥርና የሕሙማን ደህንነት ጥበቃ ረገድ እጅግ ከፍተኛውና ተደራሽ ለመሆን አስቸጋሪው መመዘኛ እንደሆነ ይታወቃል።

አንድ የሕክምና ተቋም ይህንን ዕውቅና ለማግኘት የክሊኒካዊ እንክብካቤ ደረጃን፣ የኢንፌክሽን መከላከያና መቆጣጠሪያ ስልቶችን፣ የመድኃኒት አያያዝን፣ የተቋማዊ አመራር ብቃትንና አጠቃላይ የሥራ አፈጻጸምን ጨምሮ በመቶዎች የሚቆጠሩ ጥብቅ መስፈርቶችን ማሟላት ይጠበቅበታል።

ይህንን ስኬትና የሆስፒታሉን አንደኛ ዓመት በዓል አስመልክቶ በተዘጋጀው ሥነ-ሥርዓት ላይ የጤና ሚኒስትሯ ዶክተር መቅደስ ዳባ፣ ከፍተኛ የመንግሥት የሥራ ኃላፊዎች፣ የዲፕሎማቲክ ማኅበረሰብ አባላትና የዓለም አቀፍ ድርጅቶች ተወካዮች ተገኝተዋል።

በወቅቱ ንግግር ያደረጉት ዶክተር መቅደስ ዳባ፣ የተገኘው ዕውቅና ለኢትዮጵያ የጤና ዘርፍ ትልቅ ኩራት መሆኑን ገልጸው፣ ሀገሪቱ ዓለም አቀፍ ደረጃቸውን የጠበቁና የሕሙማንን ደህንነት የሚያረጋግጡ የሕክምና ተቋማትን መገንባትና ማስተዳደር እንደምትችል ማረጋገጫ ነው ብለዋል።

አክለውም መንግሥት የሀገሪቱን የሕክምና አገልግሎት ደረጃ ከፍ ለሚያደርጉና በጥራት ላይ ለሚሰሩ የግል የጤና ተቋማት አስፈላጊውን ድጋፍና ማበረታቻ ማድረጉን እንደሚቀጥል አረጋግጠዋል።

የሆስፒታሉ አመራሮች በበኩላቸው፣ ይህንን ዓለም አቀፍ ዕውቅና ለማግኘት በሕክምና ሥርዓቱ፣ በመሰረተ ልማት እና በባለሙያዎች ልማት ላይ ከፍተኛ መዋዕለ ንዋይ መፈሰሱን ገልጸዋል። ስኬቱ የተገኘውም ከመላው የሕክምናና የአስተዳደር ሰራተኞች የተቀናጀ ጥረትና ለላቀ አገልግሎት ከነበራቸው ቁርጠኝነት በመነጨ እንደሆነ ጠቅሰዋል።

ይህ ዕውቅና ቤተስዳ ሆስፒታልን በዓለም አቀፍ ደረጃ ተገዢነታቸውን ካረጋገጡ ጥቂት ተቋማት ተርታ የሚያሰልፈው ሲሆን፣ በሀገሪቱ የመንግሥትም ሆነ የግል የጤና ተቋማት የሕክምና ጥራትንና የአሠራር ሥርዓትን እንዲያሻሽሉ ምሳሌ እንደሚሆን የዘርፉ ባለሙያዎች ገልጸዋል።

ስኬቱ የኅብረተሰቡን በሀገር ውስጥ ሕክምና ላይ ያለውን እምነት ከማሳደጉም በላይ፣ ኢትዮጵያ በምሥራቅ አፍሪካ ቀጣና በሕክምናው ዘርፍ ያላትን ስም እንደሚያጠናክረው ይጠበቃል።