فيه ناس بتخلط ما بين تعلم اللغة والتشبه بأهلها وإنك كل ما قربت تبقى نسخة من أهل البلد، كل ما بقيت أحسن.
فتلاقي الواحد داخل يتعلم إسباني، وبعد سنتين بقى همه الأكبر إنه يقنع الناس إنه مولود في ضواحي مدريد، أو إن جدته كانت بتعمل له paella وهو صغير
أنا لما أتعلم إسباني، مش هدفي أطلع لإسباني أقوله:
خمن أنا منين؟
فيقعد محتار نص ساعة.
دي مهارة لطيفة أكيد، بس مش هي الغاية العظمى اللي من أجلها قامت الحضارات يعني
أنا مش عايز الإسباني يفتكرني إسباني أو الأرجنتيني يفتكرني من مواليد بوينوس آيرس
أنا عايزه ينبهر إزاي واحد مصري قادر يفهم ثقافته، ويتكلم لغته، ويناقشه في تاريخه وأدبه ونكاته، وهو لسه محتفظ بروحه وهويته!
المتعلم الحقيقي هو اللي يخليه بعد خمس دقايق ينسى أصلًا يسأله السؤال ده.
فاللغة مش عملية تجميل للهُوية أو انسلاخ منها… اللغة عملية توسيع للهُوية.
وحقيقي مفيش مشكلة إن يبقى عندك أثر مصري في كلامك.
المشكلة الحقيقية إن يبقى عندك صوت/ لكنة/ اكسنت إسباني ممتاز… وأفكار فقيرة متقدرش بعد 10 دقايق كلام تلاقي حاجة تقولها.