حبيت أشارككم قصتي 🤍
من زمان كان حلمي إني أدرس تمريض وكنت أتمنى أوصل له وأسعى له بكل الطرق لكن ربي ما كتب لي هالطريق ، انقبلت في تخصص الفنون ودرسته سنتين وخلال هالسنتين كنت أحاول أغيّر وأوصل للتمريض لكن بالنهاية أيقنت إن ربي ما كتب لي هالشيء.
بعد سنتين قررت أغيّر تخصصي وأبدأ صفحة جديدة واخترت تخصص علوم الرياضة والنشاط البدني واخترته لأني حبيت المجال ولأن طموحي مستقبلًا أشتغل في مجال إصابات الرياضيين وأساعدهم في العلاج والتأهيل والرجوع لممارسة الرياضة. 🏋🏻♀️🤍
يمكن تخصصي الحالي مو هو الحلم اللي كنت أتمناه بالبداية ويمكن في البداية كان صعب علي أتقبل إن الطريق اللي رسمته لنفسي تغيّر لكن مع الوقت فهمت إن مو كل شيء نتمناه يكون هو الخير لنا وإن ربي أحيانًا يغيّر لنا الطريق عشان يوصلنا لمكان أجمل مما كنا نتخيل.
والأهم إني تعلمت إن السنتين اللي قضيتها في تخصص الفنون ما كانت ضياع ولا فشل كانت جزء من رحلتي تعلمت منها وكبرت فيها وعرفت أكثر وش ابي ووش يناسبني.
والحين بدأت أتقبل طريقي الجديد وأتحمس لمستقبلي فيه وإن شاء الله أحقق فيه شيء أفتخر فيه وأوصل للمكان اللي أبيه.
وأحب أقول لأي شخص يحس إنه تأخر أو إن حلمه ما تحقق أو إنه اضطر يبدأ من جديد:
لا تعتبرون تغيير الطريق نهاية يمكن يكون هو البداية الحقيقية.
لا تقيسون نجاحكم بسرعة وصولكم ولا تقارنون بدايتكم بغيركم، كل شخص له وقته وطريقه ورزقه.
يمكن اليوم ما نفهم ليه بعض الأبواب تسكرت لكن بعد فترة بنلتفت ونقول: الحمدلله إن ربي ما كتب لي اللي كنت أتمناه لأنه كتب لي شيء ما كنت أعرف إني أحتاجه. 🤍
استمروا، حاولوا، وإذا تغيّر طريقكم لا تخافون من البداية من جديد… دامكم ما استسلمتوا، فأنتم للحين في الطريق.✨
