من فترة جالي طفل بيشتكي من حساسية صدرية. والده قالي:
رحت لدكتور كبير ومشهور… إداني علاج،و الطفل ما ارتاحش
غيرت ورحت لدكتور تاني… إداني علاج والطفل ارتاح
الفضول شدّني أبص على الروشتتين…
لقيت نفس العلاج!
نفس المواد، اختلاف بسيط في اسم الشركة… ودي ودي، الشركتين من الكبار، يعني مافيش فرق علمي كبير يبرر فرق الإحساس ده.
وما وقفتش على كده…
جالي طفل بيعمل جلسات صدر، على وصفة زميل محترم…
الأهل بيقولوا مفيش تحسّن.
عملنا جلسات مشابهة جدًا، يمكن ما أضفناش حاجة ثورية…
لكن الغريب؟ الطفل اتحسّن، وبدأ يتنفس أفضل.
المواقف دي رجعتني لأول سنة شغل في حياتي…
لما اب بسيط قالي جملة عمري ما نسيتها:
“يا ابني… هنا علاج، وهنا علاج، بس ربنا اللي بيريد هتخف على إيد مين!”
وقتها افتكرت إن فيه حاجات في الطب ما بتتكتبش في الكتب…
زي “رزق الإيد”، و”راحة النفس”، و”دعوة مريض”، و”نصيب ربنا كاتبه”.
عرفت إن من أعظم النِعم، إن ربنا يجعل الشفاء يمر من خلالك…
وإنك تكون سبب في راحة، حتى لو ما عملتش غير اللي كلنا بنعمله.
الموضوع مش دايمًا شطارة،
فيه دايمًا لمسة خفية… اسمها “القبول”.❤️
Dr hesham El kattawy
August 24, 2026 2.3K 12
