وقفي لين الزمان يمرنا بأربع فصوله
الثواني مستحيل إنها تكون اللي بقى لي
يوم جيتي كان ياكثر الكلام اللي بقوله
ويوم رحتي ما لقيت من الكلام الا، تعالي!
يا ثمر قلبٍ وهبك الله مرابيه وميوله
أنتي الدنيا وأهلها كلهم وأنا لحالي
إن ذبحتيني جعل روحي فدا العين الخجوله
و إن عتقتيني جعلت الليله أعز الليالي
ما بعد هز الندم قلبي على شي يطوله
لين شفت النظره المتكلمه ترثع بحالي
جعل يسقى يوم كان الوقت ينساب بسهوله
ودقة الساعة تمر أسماعنا ولا نبالي
سلميني صوتك الممسوك أنا سيد وصوله
من متى والصمت يغلب نبرتك على وصالي
وأسأليني ليه أهاب بطلتك وأنتي جفوله
وليه لا مني تباطيتك طرى لي ما طرى لي
وعلميني من عطا شمس الشتا وجهه وزوله
ومن رسم ظله على الشاطي وهو ماسك ظلالي
وجهك اللي مستعد أعيش له وأموت حوله
يا كثر مافي تفاصيله وجودي وانعزالي
والعيون اللي قبل شوفك من الدنيا ملوله
صار يملاها الشغف حتى وأنا أشوفك قبالي
رفرفة روحي على قدٍّ تبرا من نحوله
رفرفة طيرٍ على الغصن الهزيل من الشمالي
الحظيظ اللي لقى بعيونك النجلاء قبوله
من يلومه لا زهد في الأمنيات وفي الليالي
لا المحبه طاوعتني في زعلك ولا الرجوله
غاليه يا الدمعه اللي ما تطيح الا لغالي
21 أكتوبر 2026 426 4
