من زاحم يومه بالقرآن بارك الله له في يومهُ
عندي رفيقة في حلقة التحفيظ اللهم بارك عليها وثبتها
دايماً اول م تبدأ الحلقة بتستاذن مننا معليش يا اخوات ممكن أسمع اول واحدة عشان طالعه المدرسة
وياما صادف عندها إمتحان
فـ سبحان الله صار لها النصيب الأول في السرد دايماً
حتى ولو دخلت متأخرة بنخليها تسرد اول
حقيقي اللهم باارك لأنها رتبت أولوياتها صح
يعني وهي في عز انشغالها بالمدرسة والامتحانات والواجبات والضغط دا اختارت القرآن من اولوياتِها
تصحى بدري تراجع حفظها تجي الحلقة
تسمع أول واحدة وتطلع عشان تلحق مدرستها وامتحانها وهي مرتاحة لانو م خلت المشاغل تكون عائق بينها وبين القرآن فهنيئاً لها
طيب ونحنا؟
الواحدة مننا توقف حفظ عشان الجامعة ضاغطة
وياما تأجل الحلقة عشان الامتحانات
وياما نهجر مصحفنا بالشهور عشان مشغوليات لا تسوى على القرآن شيء
فهي اختارت القرآن أولى على كل شيء
طيب حجتك شنو إنتِ قدام ربنا يوم القيامة؟
قال الإمام الشافعي رحمه الله
"طلبنا ترك الذنوب فوجدناه في صلاة الضحى
وطلبنا ضياء القبور فوجدناه في قراءة القرآن"
يعني عايزة نور في قبرك عليك بالقرآن
عايزة بركة في وقتك عليك بالقرآن
عايزة توفيق في امتحاناتك عليك بالقرآن
فوالله يا تقية القرآن ما بياخذ من وقتِك
بالعكس القرآن هو البيبارك وقتِك وبيرتب يومك
اللي بتقول ما عندي زمن دي كذابة على نفسها
يعني عندنا زمن للتلفون بالساعات
وعندنا زمن للطلعات والونسة
وعندنا زمن للغير وبس ما عندنا ٣٠ دقيقة للقرآن
يا خسااارة والله😔
رفيقتي دي علمتني إنو اللي عايز بلقى طريقة
واللي ما عايز بلقى عُذر
ولا خير فيمن هجر القرآن بحجة الانشغال
لأنو الانشغال الحقيقي هو انشغال القلب عن الله
فيا تقية ابدئي يومك بالقرآن
ثبتي ورد ثابت ما تتنازلي عنه حتى لو آية
قليل دائم خير من كثير منقطع
من شبَّ على تأجيل القرآن شاب على هجره
ومن شبَّ على مزاحمة يومه بالقرآن
شاب على البركة والتوفيق
والسلام!
#رَغَدْ_عبدالقادر
June 15, 2026 79
