يا أخي الكريم، إذا في ناس دافعين لك فلوس عشان تيجي تحكي حكي معيّن هون، ترى ما فيها شي، صدقاً يعني.. بس بشرط إنّك تحكي لنا.. صارحنا.. قول لنا إنّه ترى أنا يا شباب مدفوع لي، وبالتالي مجبور آجي هون وأحكي هالحكي اللي انتوا شايفينه..
ليه المصارحة هاي كثير مهمّة؟ لأنّه إحنا كمتلقّين "برءاء" في الظلام الدامس بنكون.. وبنكون بكلّ سذاجة وحسن نيّة مفكرين إنّه انت زينا، عندك عقل ورأي بتدافع عنّه وهيك، وبنكون قاعدين نحاول نقنع فيك.. ونجيب لك أدلّة من هون وبراهين من هناك، وصور وفيديوهات وخلافه.. وهذا الشي مرهق والله، ومحبط.. خصوصاً في ظلّ هاي الأوضاع.. وبنزعل كثير بس تصرّ على ضلالك،وما تقتنع بأدلّتنا الدامغة وبراهيننا الساطعة.. وممكن كمان بعدها نتّهمك -لا سمح الله- إنّك غبي حاشاك.. وبنتعب نفسيّاً احنا من ورا هالشي.. يعني الموضوع كله بكون متعب..
فخلص يا أخي، بلاها حمّة البال اللي على الفاضي هاي.. احكي لنا بكلّ تجرّد وأخويّة إنّه انت عليك أقساط والحياة صعبة، وإنّه هاي طريقة تحسّن فيها دخلك شوي، وإنّك هون مجرّد شغّيل جاي تحكي هالكلمتين الماسخات اللي محفّظينك إياهم وتروح، فخلص بنسكت.. لأنه احنا كلّنا شباب مكافح وفاهمين على بعض.. فبنتركك في حالك.. لأنّه هاد المنطق! يعني لو حدا راح يسهر في مكان، وهناك كان في راديو بلعب أغنية لعبد الحليم، والشخص هاد جاي على باله يسمع أم كلثوم، وقعد يحكي مع الراديو بهالخصوص، راح يستجيب له الراديو؟ راح يلبَي طلبه؟
فهيّ هيك.. انت بس صارحنا إنّك راديو مستأجر، والموضوع محلول إن شاء الله..
November 6, 2023 8.3K 1 8
