السلام عليكم ورحمة الله وبركاته، ده ريفيو مفصل عن مستشفى اليسر بكيلوباترا (بعد إشارة سيدي جابر)، علشان يساعدكم في الاختيار.
🏥 البنية التحتية والجو العام
المكان والشبكة: مبنى المستشفى والبنية التحتية مش أفضل حاجة، والشبكة جوه وحشة جداً واللوكر اللي بنام فيه وحش وضيق ـ المرتبه ع الارض .
الإدارة والتعامل: الإدارة محترمة جداً ومش بياكلوا حق حد. البيئة النفسية مريحة والتعامل كويس وأغلب الناس بتخاف ربنا.
الأطقم الطبية: الدكاترة شاطرين وبيعلّموا، ومعاهم فريق كلينيكال فارما ممتاز. المستشفى في "الباطنة" تعتبر من أعلى الأماكن في إسكندرية وبيجيلها استشاريين من كل الأقسام.
البيئة والتمريض: أغلب الاستاف وتمريض الامتياز من دمنهور وكفر الشيخ، المكان ميهوش أكاديميات أو معاهد، والبيئة ملتزمة دينياً (مسموح بالنقاب، الخمار، الجيب، والشباب بدقنهم عادي)، وهي من أقل المستشفيات في الاختلاط السيء.
🛏️ السكن والمميزات والخدمات
السكن: بعد شارعين من المستشفى، فيه (تلاجة، بوتاجاز، 3 غرف، حمام، مطبخ). في الأول كان زحمة وبننام 2 على السرير بسبب اللونجات، بس مع الشفتات بعد كدا بيبقى فاضي وبننام كويس (بيخصموا 150 جنيه بس من القبض للسكن).
الخدمات على الحساب: تقدري تاخدي علاجات من الصيدلية، تعملي تحاليل، أو تطلبي وجبات من مطبخ المستشفى ويتخصم من القبض.
رمضان: المستشفى بتوزع وجبات وعصير وتمر كل يوم في رمضان. وجبه فطار بس
💼 الأقسام المتاحة ونظام "الروتيشن"
⚠️ ملحوظة هامة: المستشفى مفيهاش روتيشن ، القسم اللي هتنزل فيه أول السنة هتفضل فيه لآخرها، .
الداخلي: هو القسم الأساسي اللي بياخد العدد الأكبر من الامتياز، والمستشفى قايمة عليه حرفياً.
العناية والغسيل الكلوي: بياخدوا أعداد قليله جداً (2-3 بالكتير)، وغالباً الأولوية للي اشتغلوا في الأقسام دي قبل كده أو بترشيح.
الطوارئ والعمليات: الطوارئ بتحتاج حد شغال قبل كده. العمليات أغلبها مسالك بولية، استئصال كلى ، مناظير جهاز هضمي، وتوصيل/تصليح (Shunts).
🩺 طبيعة الحالات والتعليم (الداخلي)
المستشفى أساساً مستشفى كلى، فأغلب حالات الداخلي كلى ومعاها مضاعفات ضغط وقلب وسكر وهكذا .
الداخلي هناك يعتبر عناية متوسطة؛ الحالات تقيلة ومش خفيفة زي بقية المستشفيات (حالات فيها قرح محتاجة كير وتقليب، وحالات ماشية على Syringe Pump)، بس مفيهاش جهاز تنفس صناعي.
مستوى التعليم: مش زي مستشفيات عامة كبيرة (زي المبرة مثلاً) بتدخلها كل أنواع الحالات، هنا هتتخصصوا أكتر في الكلى ومضاعفاتها. في أول السنة بيكون فيه أورينتيشن
وفي محاضرات لمكافحة العدوى ، وفيه جروبات بينزل عليها معلومات.
⏱️ نظام الشفتات والروستر (الضغط الجسدي)
الشفتات حالياً كتيرة جداً وفوق الوصف؛ الروستر غالباً بيبقى 4 أيام في الأسبوع.
الشفت بيوصل لـ 18 ساعة وساعات 24 ساعة، والراحة بين الشفتات ممكن تكون 6 ساعات بس (بيبقى فيه ريست جوه الشفت حوالي 3 ساعات). بس في اول السنه مكناش بنكمل ساعاتنا اصلا مع الوقت بقينا في الأسبوع بالابع ايام
: الناس اللي بتتعب جسدياً ومش بتقدر، الإدارة ممكن تقلل لهم الساعات لو بلغوا إنهم مش قادرين على العدد ده ممكن ياخدوا لونجات مثلا .
💵 الماديات والقبض
ساعة الامتياز: 17.5 جنيه.
ساعة الأوفر تايم: 23 جنيه.
الاستاف الخريجين (بكارنيه): الساعة بـ 32 جنيه.
القبض الجديد للامتياز: مستر عباس قال إنه هيبقى 3000 جنيه (مش متأكدة من الكلية ولا المستشفى).
المميزات المادية: القبض منتظم جداً ومش بيتأخر وساعات بينزل قبل يوم 30.
فيه عيدية 500 جنيه في العيد، ومفيش بدلات سهر أو وجبة، بس الشفت في الإجازات الرسمية بيبقى عليه فلوس زيادة (بدل إجازة).
💡 نصيحة أخيرة
اللي اشتغل عناية قبل كده وعايز سنة مريحة، أو اللي مش بيفكر يشتغل عناية بعد الامتياز وعايز عائد مادي مجزي، الداخلي هنا خيار كويس جداً.
افتكروا دايما إن دي سنة تدريبية مش مطلوب منكم تطلعوا عارفين كل حاجة، المهم تختاروا مكان ترتاحوا فيه نفسياً ومتكرهوش المهنة. بالتوفيق وصلوا استخارة!
